KOMUNIKADO DI KUERPO POLISIAL KÒRSOU Aksidente di tráfiko ku morto.

KOMUNIKADO DI KUERPO POLISIAL KÒRSOU

042/ 2020

26 yanüari 2020

Aksidente di tráfiko ku morto.

Djasabra 25 di yanüari 2020, alrededor di 14.58’or, Sentral di Polis a risibí notifikashon di un aksidente di tráfiko ku a tuma lugá dilanti un minimarket den Dein.
E unidat polisial ku a yega na e sitio a kuminsá ku un investigashon preliminar i a resultá ku un dama manehando su vehíkulo a kore yega pa stashoná e vehíkulo dilanti di un minimarket. Pa un motibu of otro na lugá di e shofúr primi brek, su pia a resultá riba e pedal di gas. Dor di e akto aki e vehíkulo a bai dilanti i alkansá un hòmber ku tabata sintá riba un stul riba e stupi dilanti di e minimarket. A konsekuensia di esaki e hòmber a keda heridá. Ambulans a transportá e víktima den situashon di prekupashon pa poliklínika di CMC pa tratamentu médiko mas avansá.
Djadumingu 26 di yanüari 2020, alrededor di 06.17’or, polis a risibí informashon ku e hòmber Jose Antonio Farrell, nasé na Kòrsou 17 di aprel 1947, ku tabata involví den e aksidente ariba menshoná a fayesé a konsekuensia di e leshonnan ku e la risibí. Personal di tráfiko ta kontinuá ku e investigashon.