Minister di Salú, Medioambiente i Naturalesa, Suzy Camelia-Römer, a hasi bishita na proyektonan di agrikultura orgániko i moderno.

Minister di Salú, Medioambiente i Naturalesa, Suzy Camelia-Römer, a hasi bishita na proyektonan di agrikultura orgániko i moderno.

 

Den fin di siman ku a kaba Minister Camelia-Römer huntu ku un delegashon a hasi bishita na sinku proyekto agrario desaroyá riba su inisiativa ku meta pa forma un komunidat di ‘wellness’ ku ta produsí su mes alimento sano i nutritivo, na preis pagabel pa asina yega na un poblashon salú i energétiko.  E proyektonan ta konsistí di un sentro pa training i diferente proyekto di agrikultura orgániko i moderno  na diferente lokashon di Kòrsou. 

Den e afan pa promové nutrishon sano, Minister Camelia-Römer ta enfatisá ku Kòrsou tin di produsí su propio alimento. Ta den e kuadro aki Minister di GMN a lansa vários proyekto piloto ku e meta pa optimalisá i elevá produkshon den e sektor agrario. 

E intenshon básiko di proyektonan aki ta pa fungi komo modelo pa pueblo di Kòrsou i spesialmente agrikultornan por haña konosementu riba diferente teknologia i téknikanan moderno.

 

Dos di e proyektonan ta riba tereno di e Uitvoeringsorganisatie Agrarisch en Visserij Beheer  ‘AVB’, ántes LLV na Kwartier. E promé ta un sentro pa training ku ta den konstrukshon. Pa promé mitar di e aña aki e sentro lo ta operashonal i lo duna oportunidat pa training di diferente método di agrikultura. Parti di e proyekto aki  ta entre otro “Kunukito sin suelo” ku ta agrikultura hidropóniko, esta ku ta hasi uso di awa ku algun supstansia en bes di tera. Tambe lo tin e téknika di lombri-kultula ku ta usa bichi di tera i lo planta kuminda pa bestia. 

E di dos proyekto na AVB ta un proyekto piloto di agrikultura re-generativo, esta ku sòru pa e sistema ekológiko di tera biba bèk. 

 

Despues a bishitá e di tres proyekto na Fuik kaminda tin un plantashon di piloto di permakultura, un sistema di planta den konkordansia ku naturalesa i planta diferente fruta i berdura  dor di otro pa asina un a sostené otro ku kada un su karakterístika partikular. Ademas ta hasi uso di un sistema di fangu i konserva awa ku kanalnan smal, horizontal i un tiki inkliná, yamá ‘swales’.

 

Proyektonan kuater i sinku ta karga e nòmber “Ban Planta Awa”. E di kuater proyekto ta di “syntropic farming’ na Lilienberg. Agrikultura sintropiko ta konsentrá riba rekonstrukshon di e forma ku matanan ta krese den naturalesa. P’esei e ta un forma di permakulura i na mes momentu tambe e ta re-generativo i ta biba e tera.   E sistema aki su produkshon ta hopi haltu pa meter kuadrá i e ta wanta awa den tera. E proyekto aki a konta ku guia di e Brasileño Thiago Giminez Barbosa, ku durante 1 siman di training intensivo a instruí yunan di Kòrsou kon pa apliká e téknika aki teniendo kuenta ku nos kondishonnan di klima.

Por último e di sinku proyekto piloto ta di reforestashon. Ta usa palu di wabi, ku ta kòrta hasi kòrtiku  i ta snui e brasanan. Di e forma aki, e wabi ku tin rais profundo i ku ta krese bai leu, ta trèk awa trese ariba pa e por krese bèk. Rondó di e palunan di wabi aki, lo planta fruta i berdura riba un tera ku ta kontené mas awa. Ta bon pa bisa ku tur  e proyektonan ta hasi uso di “mulch”, esta blachi òf mata kòrta chikí pa tapa e terenonan di agrikultura pa konservá awa. Lokual ta hopi efektivo

 

Minister Camelia-Römer  ta satisfecho ku e desaroyo positivo di tur e proyektonan piloto aki i ta spera ku pronto ora ku esakinan ta den estado di eksposishon, pueblo di Kòrsou en general i sigur agrikultornan ta uza e oportunidat tremendo aki pa amplia konosementu den e sektor agrario.