Krioyo Film Studio ta bira miembro di e plataforma mundial FilmFreeway i logra su promé selekshon internashonal
Krioyo Film Studio ta bira miembro di e plataforma mundial FilmFreeway i logra su promé selekshon internashonal
WILLEMSTAD – Krioyo Film Studio, un subsidiario di Krioyo Film Foundation, ta orguyoso di anunsiá ku resientemente a registra i bira miembro di FilmFreeway, e plataforma di festival di sine mas grandi di mundu. E plataforma aki ta konektá mas ku dos miyon realisadónan di film (sine) ku mas di 14,000 festival na nivel mundial. Esaki ta representá un paso importante den e desaroyo i internashonalisashon di produkshonnan lokal (FilmFreeway).
Ademas, Krioyo Film Studio a kompletá i entrega e dokumental titulá “Di Kòrsou pa Venezuela: ENRICO”, un produkshon lokal ku ta konta e bida i trayekto musikal di e artista YDK Enrico Henriquez. E dokumental ta relatá kon Enrico, durante su tempu tokando riba un ferry ku tabata hasi ruta pa La Guaira na Venezuela, a tuma e desishon pa baha i keda na Venezuela, kaminda e a biba i desaroyá su karera pa mas di 33 aña, inkluyendo kolaborashonnan ku artista internacional manera Oscar D’León.
E guion di e dokumental tabata den man di Giovanni Atalita, miéntras ku e narashon tabata den enkargo di Rignald Maduro. Produktor di e dokumental aki ta Jose “Pipo” Villasmil.
Den fin di siman tras di lomba, Krioyo Film Studio a risibí e siguiente notifikashon ofisial:
“Congratulations! FIVE CONTINENTS INTERNATIONAL FILM FESTIVAL has updated the Judging Status of your submission ‘Di Kòrsou pa Venezuela: ENRICO’ to Selected.”
Ku esaki, e dokumental a logra su promé selekshon ofisial pa un festival internashonal, un logro importante pa e estudio i pa industria di film na Kòrsou.
Krioyo Film Studio ta sumamente kontentu ku e promé festival a aksepta pa presentá e dokumenta. Nos ta mantené nos enfoke pa sigui ekspandé nos presensia riba mercado internashonal ku mas inskripshon den diferente festival.
Ku e integrashon den FilmFreeway, Krioyo Film Studio lo por brindá guia i duna apoyo na otro produktornan independiente lokal, pa nan tambe por pone nan produkshonnan riba merkado mundial i logra visibilidat internashonal.
Krioyo Film Studio ta keda komprometí na promové talento lokal i kontenido na Papiamentu riba plataforma global.
