Ced Ride ta bira inmortal ‘online’ ku lansamentu di su wèpsait ofisial.

 

Ced Ride ta bira inmortal ‘online’ ku lansamentu di su wèpsait ofisial.

Willemstad – For di 14 di novèmber 2021 último, e gran artista yu di Kòrsou Cedric Ridderplaat tin su propio wèpsait ku lo inmortalisé ‘online’ pa semper. E wèpsait www.cedride.com tabata un deseo grandi i inisiativa di e propio Ced tempu ku e tabata na bida.

Na 2018 huntu ku su amigu personal, Morgan Isenia nan a kuminsá traha riba e bunita projekto. Durante hopi aña di amistat, Ced a entregá na Morgan masha hopi material balioso pa añadí na su kolekshon i krea un archivo di dje i warda esaki p’é. E meta tabata hustamente pa di forma digital, inmortalisá e gran artista Ced Ride.

Riba e wèpsait nobo di Ced tin masha hopi material eksklusivo, entre otro un kolekshon amplio di Ced su obranan musikal, un biografia amplio riba bida personal i komo artista. Ademas un koleshon eksklusivo di masha hopi foto ku nan informashon korespondiente ku ta reflehá su bida i karera. Tambe por mira algun di su pinturanan i otro materialnan audiovisual i entrevistanan ku Ced a duna durante su karera. Na momentu di fayesimentu di Ced, Morgan a komprometé pa finalisá e bunita projekto i asina kumpli ku e deseo profundo di su gran amigu.

Ced ta un dje artistanan mas stimá na Kòrsou, ku semper a demostrá un amor imenso pa su isla, su lenga i su pueblo. Su deseo humilde semper tabata pa tur hende por tin aseso liber na su musika, materialnan, su historia i konosementu. Komo tal riba e wèpsait di Ced, pueblo di Kòrsou i fanatikonan rònt mundu por subi i skucha kansionnan di Ced i haña tur informashon di e artista na kualke momentu di dia ku nan ta deseá. E intenshon ta pa e wèpsait sigui krese ku mas material di Ced Ride. Pues tur hende ku tin mas material di Ced ku nan lo kier kompartí ku pueblo di Kòrsou por tene kontakto libramente pa por inkorporá esakinan den e sitio digital di Ced Ride. 



Di e manera aki Morgan Isenia a kumpli ku e promesa na su gran amigu i ta regalá pueblo di Kòrsou i mundu e wèpsait profeshonal i ofisial di e gran artista Ced Ride i pa asina inmortalis’é ‘online’ pa semper.

Un danki grandi na tur ku di un manera òf otro a kontribuí ku materialnan adishonal i tambe na Ieteke Witteveen i Farley Lourens ku a kontribuí ku algun foto, pero prinsipalmente pa e relatonan skibí riba bida i historia di Ced Ride. Pues un i tur ta invitá pa subi www.cedride.com i disfrutá di e legado impreshonante ku e gran artista Ced Ride a laga pa su dushi pueblo di Kòrsou i mundu. Kompai, bo no ta muri nunka.

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: