Minister Plenipotencario na Washinton DC ta bishita Montgomery Community College (MCC) pa un posibel colaboracion cu EPI College.

Minister Plenipotencario na Washinton DC ta bishita Montgomery Community College (MCC) pa un posibel colaboracion cu EPI College.

 

Conforme e vision di Minister di Enseñansa y e mision di EPI College, bou maneho di su Director Ryan Maduro, EPI den futuro lo kier ofrece un combinacion di MBO Diploma y Associates Degree conforme e sistema Hulandes y Mericano.

 

Minister Plenipotencario na Washinton DC, Joselin Croes, a duna di conoce cu e deseo pa e cambio aki ta pa brinda e studiantenan na Aruba opcion di estudio, educacion online, y e posibilidad pa adultonan por haya certificacionnan cu ta util pa Aruba.  

 

Actualmente EPI ta ofrece varios MBO Diploma riba nivel 3 y 4 den ingenieria, admistracion y salud y nan ta ofreciendo dos Associates Degree den Culinary Arts y Hospitality Management. E intención di EPI ta pa añadi otro vaknan manera Information Computer Technology, Nursing, Cybersecurity y pa ofrece un Associates Degree pa tur e vaknan cu nan tin awo na nivel 3 y 4.

 

EPI kier partner cu un of mas Community College na Merca pa yuda EPI cu e implementacion di nan mision. E partner aki mester ta uno acredita na Merca, e mester ta mas o menos mesun grandi cu EPI, e mester tin experiencia cu partnership internacional y e mester tin vaknan cu ta cuadra cu esunnan di EPI. 

 

Despues di a bishita varios community Colleges, e tresnan cu a sobresali ta: Roxbury Community College na Boston, Montgomery Community College na Washington DC y Miami Dade Community College na Miami. Pronto un team lo biaha pa Boston pa bishita Roxbury Community College pa elabora riba un partnership pa introduci un Associates Degree den Information and Computer Technology y Nursing na EPI. Despues e team lo biaha pa Washington DC pa elabora riba un partnership cu MCC pa yuda EPI cu e cambionan cu nan ta desea. MCC ta conseha pa evalua kico ta e trabounan cu mester wordo haci, kico ta e materialnan cu EPI ta bay tin mester, cuanto e proyecto completo lo costa EPI y mira kico ta e miho curiculo pa EPI introduci. MCC ta conseha pa haci baby steps, dus cada un of dos aña introduci otro curiculo y poco poco haci e transicion.

 

E team di MCC tawata asina entusiasma pa por traha cu EPI y cu Aruba, cu nan a invita EPI pa forma parti di nan United Nations Sustainable Development Goals Open Pedagogy Fellowship Program y pa ofrece e studiantenan actual di EPI y di Aruba e oportunidad pa haya nan Associates Degree via e programa online di MCC cu ta costa entre USD 5000 pa USD 7000 pa aña. MCC ta ofrece mas di 50 Associates Degrees on-line cu por scoge di dje.  

 

Minister Plenipotencario Joselin ta contento cu e logro aki y ta spera cu ora e team di EPI biaha pa Boston y Washington DC cu por logra proyectonan concreto cu por yuda mehora y modernisa educacion na Aruba y brinda mas oportunidad na jong y biew pa sigui studia.

This site uses Akismet to reduce spam. Learn how your comment data is processed.

error: Content is protected !!
%d bloggers like this: