Molèster di huma dor di kandela di shushi den área di Muizenberg i diferente otro barionan

Minister di GMN

Señora S. Camelia-Römer
PRESENTE

Kòrsou, 30 di yanüari 2020

Tópiko: Molèster di huma dor di kandela di shushi den área di Muizenberg i diferente otro barionan

 

Señora Minister Camelia-Römer,

 

Pa medio di esaki suskrito Gilmar Pisas, miembro di Parlamento di Kòrsou pa frakshon di MFK ta aserka bo persona komo minister enkargá ku Salu Medio Ambiente i Naturalesa (GMN) ku e siguiente preokupashon di siudadanonan ku ta biba den e área di di Muizenberg i besindario. 

 

Ta reina hopi preokupashon serka abitantenan ku ta biba den bario di Muizenberg i otro barionan den bisindario, abitantenan ya pa hopi tempu kaba tin hopi molèster di huma di un kandela ku ta bini for di área di Sabana Hundu. E abitantenan ta splika ku nan mester biba sera den nan kas, debí ku e huma ta dañino pa nan salu na promé lugá, pero tambe nan propiedatnan ta wòrdu afektá pa e huma aki. 

 

Síntomanan di e huma aki ta, kimamentu den wowo, wowo ta bira kòrá, wowo ta kore awa, kimamentu den nanishi, nanishi ta kore awa, kimamentu i iritashon den garganta i hopi tosamentu. Segun e abitantenan, esaki no ta promé biaha ku bario di Muizenberg i otro barionan den bisindario ta sufri di molèster di huma. Nan a tuma nota ku ta sende e kandela aki den oranan di anochi i/òf mardugá ora ku e outoridatnan di GMN no ta trahando.   

 

Suskrito a hasi esfuerso dor di yama e instansianan konserní, pa atendé ku esun ku ta doño di e tereno kaminda e sushinan ta wòrdu kima, lamentabel ta ku apesar ku empleadonan di e servisio a presentá na e sitio, tòg a sigui ku kimamentu di sushi. Abitantenan no por sigui laga nan salu wòrdu afektá pa e akto iresponsabel aki.

 

P’esei nos ta aserka Minister komo e máksimo outoridat na GMN, konforme artíkulo 96 di reglamentu di Orden, ku e siguiente preguntanan pa mas pronto posibel yega na un bario di Muizenberg i otro barionan den bisindario Sano Salu i Sigur;

 

1. Minister ta na altura di e molèster di huma ku a asotá bario di Muizenberg i otro barionan den bisindario?

 

1. Minister ta na altura di e problema nan di salu ku e molèster di huma aki ta kousando i ku esaki ta liña rekto kontra Minister su maneho di “Wellnes”?

 

1. Minister por informá Parlamento, kua ta e akshonnan ku lo tuma di parti di GMN pa pone un paro definitivo na e forma klandestino aki di kima sushi, ku ta kousa molèster pa otronan?

 

1. Señora Minister por informá Parlamento, riba e trabounan ku X-Team ta ehersé i ta dikon no a aktua te ku ainda ku man duru kontra di e kimamentu di sushi aki ku a ya wòrdu registrá serka nan?

 

1. Señora minister por informá Parlamento kuantu keho di molèster di huma a keda registrá den aña 2017, 2018 i 2019 i kua tabata e akshonnan konkreto ku a ser tuma dor di e ministerio di GMN?

 

1. Minister por informá Parlamento ki dia e barionan aki ta wòrdu aliviá pa semper di e molèster di huma aki?

 

Na nòmber di e abitantenan di Muizenberg i otro barionan den bisindario, suskrito ta gradisí adelantá pa kontestanan i sperando ku señora Minister Camelia-Römer lo tuma akshonnan firme na bienestar di “Wellnes” di e abitantenan di e barionan aki. 

 

Atentamente,

      

 

Gilmar Pisas

Lider di Frakshon di MFK