Ban mustra komprenshon i rèspèt pa e ámtenar

Ban mustra komprenshon i rèspèt pa e ámtenar

 

Willemstad – Minister Jesus-Leito huntu ku Domeinbeheer ta hasi un apelashon na komunidat pa konhuntamente mustra mas komprenshon i rèspèt pa e ámtenarnan ku ta laborá den e servisio. Último dianan tin diferente atakenan verbal i físiko dirigí riba trahadónan di e organisashon aki. Esaki ta di lamentá i no por keda aseptá.

 

Domeinbeheer ta konfrontando hopi reto.Huntu ku Minister Jesus-Leito i Tim di Maneho ta trahando riba un plan pa riba korto plaso bin ku solushonnan duradero pa e lista di espera pa tereno i kantidat grandi di petishonnan.

 

Miéntras ku ta trahando, no por aseptá ku ta grita, insultá, mishi ku, òf dal un empleado públiko ku ta traha na benefisio di nos komunidat. Tampoko no ta aseptá ku ta lanta insinuashonnan kontra integridat di e ámtenarnan. Esaki ta konta pa Domeinbeheer, pero tambe pa tur otro entidat den e Ministerio, manera Servisio pa Tráfiko i Transporte, Servisio pa Obra Públiko, i Servisio pa Planifikashon Urbano ku diariamente ámtenarnan ta eksperenshá atakenan verbal i físiko di kliente. 

 

Naturalmente di parti di Ministerio tambe ta hasi esfuerso pa atendé korektamente ku tur kliente. Si un kliente a risibí un mal trato di un empleado di Domeinbeheer òf otro entidat den e Ministerio, e por mèldu esaki na klachten.vvrp@gobiernu.cw i lo atendé ku esaki ku tur seriedat. Tambe por entregá un keho via di e website www.vvrp.cw/keho. Si tin kasonan di fayo den integridat serio, por asta entregá un keho òf hasi un ‘aangifte’ na Ministerio Públiko òf Kuerpo Polisial. Lo no tolerá mas ku ta insultá òf menasá empleadonan personalmente manera a bin ta hasi. 

 

Tur kliente ta deseá pa nan petishonnan keda atendé debidamente i Domeinbeheer ta hasi lo máksimo pa sirbi pueblo di Kòrsou mas mihó posibel. 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: