Servisio di Salú Públiko (G&GZ) ta urgi un i tur pa eliminá tur lokual ku ta wanta awa pa evitá sangura di dengue pone webu, brui i plama

Servisio di Salú Públiko (G&GZ) ta urgi un i tur pa eliminá tur lokual ku ta wanta awa pa evitá sangura di dengue pone webu, brui i plama

Willemstad – Servisio di Salú Públiko di Kòrsou (UO G&Gz ántes GGD) ta enfatisá e importansia i urgensia pa eliminá tur lugá (artefakto i tanki) kaminda sangura por pone webu aden i brui.

Miéntras Organisashonnan di Salú i Servisionan di Salú ta konsentrando riba e pandemia di Covid-19, nos no mester lubidá e peliger di dengue, chikungunya òf zika.  Komunidat mester yuda evitá un eventual epidemia kousá pa kualke di e 3 malesanan aki. Aktualmente ya kaba algun isla den Karibe ta eksperensiando kasonan di dengue di e tipo 3 (tin 4 tipo) i hasta tabatin 3 kaso fatal. E peliger di sangura di dengue (Aedes aegypti) ta ku na momento ku un sangura muhé ku ta infektá ku e viro di dengue piká bo, e sangura ta pasa e viro over pa bo. Despues di un par di dia (mas o ménos 3 dia) bo ta bira malu ku síntoma manera doló tras di wowo, keintura, doló di kabes i wesu. 

 

Tin diferente sorto di sangura. Solamente e sangura Aedes aegypti por infektá bo ku e viro di dengue, chikungunya of zika. Responsabilidat di kada siudadano ta pa eliminá fokonan kaminda sangura por pone webu.
Akshon ku kada siudadano mester tuma ta:

– Kontrolá tur kaminda ku awa por keda para. Mihó manera pa eliminá sangura ta 
  pa no tin absolutamente nada ku por wanta awa.
– Tira tur artefakto artifisial òf opheto manera tayer, barí, kosnan di plèstik, ko’i
  hunga di mucha ku no ta wòrdu uzá i por wanta awa afó. Kosnan di uzo por
  warda bou di dak pa evita awa para den nan. Chèk skòter bou di pòchinan di
  mata pa bichi di sangura. Kambia e awa den glas òf pòchi un biaha pa siman i
  pasa skeiru òf bròsh pa kita webu (punta pretu) di sangura. Por trata e awa
  tambe ku larvisida òf yena e pòchi ku tera. 

– Barí, tanki di awa i renbak ta wòrdu uzá hopi pa fangu áwaseru. Tapa e barí ku
  paña i elastik di manera ku sangura no por drenta i sali. Por pone larvisida òf
  piská tambe aden. Renbak mester ta hermétikamente será. Si e ta habrí, mester
  pone piská aden òf larvisida. No por uza piská i larvisida huntu. Chèk hit (goot)
  di dak i limpia esaki saka blachinan pa awa no keda para aden.

Personanan ku ta fangu awa por buska larvisida grátis na UO G&Gz (GGD) na Piscaderaweg 49 di djaluna pa djabièrnè entre 8’or di mainta pa 12’or di mèrdia. E larvisida no ta tóksiko pa humano tampoko bestia.
Ban eliminá tur lokual ta wanta awa pa asina nos kombatí e sangura ku ta transmití dengue, chikungunya i zika.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: