MINISTER DI CULTURA A DUNA UN RECONOCIMENTO NA SR. ROBERT JEAND’OR PA SU DIGNO REPRESENTACION Y ACOHIDA DI SU TALENTO RIBA TARIMA LOCAL Y INTERNACIONAL

MINISTER DI CULTURA A DUNA UN RECONOCIMENTO NA SR. ROBERT JEAND’OR PA SU DIGNO REPRESENTACION Y ACOHIDA DI SU TALENTO RIBA TARIMA LOCAL Y INTERNACIONAL

Oranjestad – Recientemente Minister di Cultura a duna un reconocimento na sr. Robert Jeand’or pa su aporte grandi na cultura di Aruba y pa su digno representacion y acohida di su talento y musica den exterior riba tarima local y internacional. 

Robert a lanta na Madiki den un cas y famia di musico. Ya for di chikito na edad di 5 aña e tabata scucha radio y tabata bati su man riba ritmo di e canticanan. Su tata a descubri su interes pa musica y a siñe toca cuarta y despues guitara. Robert a haya les di canto di Rufo Odor, les di conocemento musical cerca Eddy Bennet y ela bay les di musica na Academia Musical di Aruba.

Su trayectoria musical a inicia ora cu ela bay cuminsa toca den e grupo di Aguinaldo Blancas Palomitas. Robert a toca den varios programa na TeleAruba, na varios restaurant y tambe hotel. Den añanan 70 Robert a cuminsa toca cu e agrupacion musical Los Juveniles hunto cu Vincente Kelly y cu e banda aki Robert a cuminsa bira famoso. Cu Los Juveniles Robert a sali tres biaha consecutivamente Rey di Tumba na Aruba, e prome tripel corona den historia di tumba na Aruba. Na total Robert a sali cinco biaha Rey di Tumba. 

Robert a toca cu varios agrupacion musiconan di fama mundial manera Los hijos del Rey na Sto. Domingo cu e tempo ey nan tabata e banda mas gusta na Sto. Domingo. Cu Los Hijos del Rey, Robert a biaha y duna presentacion na diferente pais, ela presenta entre otro na New York den Madison Square Garden como 6 biaha y cu Johny Ventura 8 biaha y 5 biaha ela canta dilanti di 24 mil hende. 

Ela biaha tambe na Europa cu Los Hijos del Rey. E temporada aki tambe ela cuminsa graba como musico den studio di grabacion y ela graba alrededor di 1000 produccion, entrenan LP, cassette, CD y tambe jingle comercial. Robert tabata biaha bay bin entre Aruba y Sto. Domingo pa despues e establece su mes na Sto. Domingo pa un temporada. Ela toca na Sto. Domingo, na Puerto Rico, New York, Hollywood y na Miami. Na Colombia ela toca na Barranquilla, Bogota y Medellin.  Ela participa tambe na Festival di Viña del Mar na Chile y e banda a gana Antorcha de Plata. Robert a compaña tambe e cantante Cubano popular Celia Cruz mas cu 10 biaha como bahista y como corista. Tambe ela compaña Johny Pacheco como corista. Robert a graba 4 produccion di CD cu e artista internacional Juan Luis Guerra y tambe a fungi como corista, bajista y tocado di maraca. Na fin di añanan 80 ela regresa Aruba y a pone un fin na su carera musical internacional. Ora ela regresa Aruba despues di a forma parti di e agrupacion La Nueva Fuerza ela lanta su mesun banda ‘Robert y su Solo Banda Show ‘na aña 1992. Robert y su Solo banda Show tambe ta acompaña e grupo di carnaval Los laga bay. Un grupo conoci pa su tremendo ambiente y a crece den parada di carnaval.

Robert ta cantante, areglista, compositor, bajista, y guitarista. E ta lider di banda y ingeniero di musica, su pasion ta musica, e kier pa e musica zona bon. Musica puro sin nada computerisa. Locual ta sobresali den Robert na esnan cu a traha cune ta e disiplina y respet cu e tin. Tur cos ta bay na ora y organisa. 

Ela ricibi tambe varios premio tanto local como internacional. Robert ta casa cu Vivian Geerman y nan tin un yiu homber Robert Reinier cu tambe ta un musico, e ta un timbalero. Robert tin un otro yiu muhe Anoushka Jeand’or cu a sali e prome Reina di Tumba den historia di Tumba di Aruba.

Na nomber di Gobierno, Minister Maduro a gradici Robert pa tur e añanan cu ela dedica na musica, pa deleita y tambe pa exporta musica rond mondo y alabes promove nos Pais Aruba, pa e dedicacion tanto profesional como boluntario, pa e contribucion na cultura di musica y pa e forma energetico di trece informacion y especialmente pa yuda nos hobennan. E mandatario a desea Robert tur clase di exito y ta spera di por sigui disfruta di su proyectonan musical.