Algun teps relashoná ku higiena, konsumo i preparashon di kuminda durante periodo di Karnaval 

Algun teps relashoná ku higiena, konsumo i preparashon di kuminda durante periodo di Karnaval 

Willemstad – Salú di hende ta dependé di vários faktor di nos medio ambiente. Higiena ta un di e pilarnan mas grandi den e struktura di salubridat di ser humano. Pa e motibu aki Gobièrnu tin algun punto importante ku komunidat tin ku tene kuenta kuné pa salbaguardiá salú en general.

 

Higiena i kuido personal

  1. Bebe sufisiente líkido (awa).
  2. Kome na tempu i evitá di kome kuminda ku a para hopi den solo.
  3. Bebe bo remedinan i kana ku informashon di bo remedi den bo tas/ pòtmòni.
  4. Evitá di tene relashon seksual pero si bo disidí di hasié usa protekshon.
  5. Tene bo kurpa limpi, espesialmente bo mannan.
  6. Kana ku un bòter di awa chikí pa bo uso personal.
  7. Sòru pa bo tin papel sanitario (tissue) serka bo. 
  8. Usa bon produkto pa evitá ku bo ta soda hopi. 
  9. Bisti paña kómodo i no paña ku ta hopi pèrtá. 
  10. Kuida bo pianan, nan mester ta kómodo i kòrda sosegá nan bon e dianan. promé ku bo bai wak òf partisipá den marcha.

 

Teps na momentu di kumpra kos

Departamentu di Salubridat (THZ) ta kontrolá tur bendedó di kos riba ruta di Karnaval.  Nan tei pa yuda vigilá e parti di higiena. Tene kuenta ku bo konsumo i unda bo ta kumpra kos.

Tene kuenta ku:

  1. Chèk si e establesementu tin pèrmit pa bende kos.
  2. E trahadó tin pèrmit pa bende kos. E pèrmit mester ta poné un kaminda ku e kliente por mira.
  3. Limpiesa di e lugá/ bendedó.
  4. Wak si e trahadó ta adekuá bistí. (kabei tapá, uña limpi etc).
  5. E lugá tin labamano òf un kaminda ku e trahadó por limpia su man.
  6. Chèk fecha di vensementu di e produkto.
  7. Wak i hole e kos di kome pa evitá di kome algu dañá.
  8. Finalmente si bo no ta konfia no kumpra kos einan. Bai un otro kaminda ku si. bo tin konfiansa.

Teps pa ora bo ta prepará kuminda

  1. Evitá di usa hopi salu i suku.
  2. Kòrda laba bo mannan.
  3. Chèk fecha di vensementu. 
  4. No usa hopi zeta.
  5. Tin kuminda ku ta daña hopi lihé den solo. Evitá di bai ku salada di batata, tuna i marisko. Si bo ta bai kuné, konserva esakinan bon den eis. 
  6. No eksponé bo kuminda na airu liber.

 

Ministerio di Salú, Medio Ambiente i Naturalesa ta hasi un yamada na kada suidadano pa gosa di Karnaval pero di un forma responsabel.

 


 

This site uses Akismet to reduce spam. Learn how your comment data is processed.

error: Content is protected !!
%d bloggers like this: