Advertisements

Laga e gruponan di Karnaval lusi nan fantasia i kreashon Laga e pueblo gosa di e marchanan di Karnaval su 50 aniversario

Laga e gruponan di Karnaval lusi nan fantasia i kreashon

Laga e pueblo gosa di e marchanan di Karnaval su 50 aniversario

 

Pa medio di e komunikado aki suskrito Gilmar “Pik” Pisas ta aserka Minister di Hustisia, Minister enkargá ku kultura, tim di maneho di kuerpo Polisial, fundashon Jag i Asosashon di Gruponan di Karnaval Kòrsou pa lo siguiente.

 

Manera konosí Kòrsou e aña aki ta selebrá 50 aña di Karnaval era nobo.  Gruponan di Karnaval ta invertí hopi pa krea e fantasia ku nan kier eksponé durante di e diferente marchanan. Invershonnan ku ta kontribuí na ekonomia di Kòrsou i tambe na diferente empresarionan chikí ku ta haña un entrada for di nos gruponan di Karnaval.

 

Meskos pueblo di Kòrsou ta sali kaya durante di e diferente marchanan pa sostené gruponan ora nan ta pasa den kaya pa estrená nan trahenan. Invershonnan ta wòrdu hasi den diferente stelaje pa asina e públiko por ta kómodo sperando e gran espektákulo ku mester pasa i pueblo ku ta sali kaya tambe ta kontribuí di forma grandioso na ekonomia di Kòrsou.

 

Tumando e aspektonan ariba menshoná na konsiderashon, suskrito ta hasi un apelashon na tur esnan responsabel ku ya a wòrdu menshona mas ariba, pa duna e gruponan e oportunidat di lusi nan kreashon i fantasia i laga e pueblo gosa i atmirá e marchanan.

 

No ranka e marchanan, no laga ku gruponan tin ku pasa na kareda i asina nan kreashon i fantasia no por wòrdu atmirá pa e públiko ku ta sali kas for di mainta tempran pa bin gosa di e manifestashon kultural mas grandi di Kòrsou. Kòrda ku nos Karnaval ta atraé masha hopi turista ku tambe kier disfrutá di e espektákulo ku nos gruponan ta presentá durante di e diferente marchanan.

 

Ku eksperensia di 50 añanan esnan responsabel pa e marchanan mester por kordiná e marchanan di tal forma ku gruponan i pueblo por tin satisfakshon ku Karnaval di aña 2020, kaminda a presentá marchanan ku nos tur por ta satisfecho ku e forma kon nan a pasa nos dilanti.

 

Di parti di frakshon di MFK nos kier felisitá i gradisí gruponan di marcha di Mucha, marcha Hubenil, marcha di Banda Abou i marcha Grandi pa brinda na Kòrsou e espektákulo ku yama Karnaval. Na pueblo di Kòrsou manera semper respetá pa bo wòrdu respetá i duna rèspèt na miembronan di nos kuerponan di mantenshon di órden publiko.

 

Felis Karnaval 2020, di parti di direktiva i frakshon di Movementu Futuro Kòrsou.

 

Gilmar “Pik Pisas”

Lider di Frakshon pa

Movementu Futuro Kòrsou

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: