Pregunta PAR: aklarashon akusashon di fundashon Venex

Na: Minister di Asuntunan General

Sr. Eugene Rhuggenaath

Fort Amsterdam

Presente

 

Kòrsou, 3 di mart 2020

 

 Tópiko: aklarashon riba akusashonnan di fundashon Venex

 

Apresiabel Minister Presidènt Rhuggenaath,

Durante e último dianan frakshon di PAR por a bin komprondé den medionan di komunikashon ku fundashon Venex ta kuestioná e forma den kual Gobièrnu di Kòrsou a manehá  e hub humanitario, konsekuentemente e produktonan ku e organisashon a importá i almasená na Curinde. E produktonan di e fundashon Venex ku a keda almasená na Curinde ku meta pa bai Venezuela den kuadro di ayudo humanitario, a yega den luna di aprel 2019 Kòrsou, despues di a pasa diferente kontratempu riba laman. For di informashon ku Frakshon di PAR ta disponé di dje e produktonan ariba menshoná a pasa diferente pais, promé ku finalmente yega Kòrsou, entre otro a purba di almasená i manda esakinan pa Venezuela via di Puerto Rico i tambe Boneiru.

Ta importante pa aklará e akusashonnan ku ta keda lansá den direkshon di pais Kòrsou. Esta ku pais Kòrsou a difikultá e ayudo humanitario yega Venezuela i/òf a stroba fundashon Venex pa almasená, kontrolá i/òf  repartí e produktonan. Kòrsou komo un di e poko pais nan den Karibe ku a pone nan mes disponibel komo hub humanitario no por permití pa haña e imágen aki. Ademas Frakshon di PAR ta interesá pa sa kua tabata e motibunan pa laga e konteinernan aki para den almasenahe – te ku nan a daña –  na lugá di por ehempel hasi uso di nan pa nesesidatnan humanitario lokal. 

Den kuadro di esaki suskrito tin algun pregunta pa Minister Presidènt Rhuggenaath:

  1. Minister Presidente Rhuggenaath por indiká kua ta e kriterionan pa hub humanitario i si fundashon Venex a kumpli ku esakinan?
  2. Minister Presidènt Rhuggenaath por informá Parlamento di Kòrsou si akaso e kònteinernan di fundashon Venex ta kumpli ku e kriterionan di hub humanitario, manera sostené dor di Parlamento? 
  3. Parlamento di Kòrsou a aprobá un moshon den reunion di 5 di februari 2019 kaminda ta urgi gobiernu pa tur gastu envolvi ku hub humanitario ta responsabilidat di e organisashon ku ta hasi uso di Korsou su servisionan. Por informá Parlamento bou di kua akuerdo i/òf kontrato a almasená e produktonan na Curinde. E fundashon Venex a akordá un kontrato komersial ku Curinde òf tabatin otro akuerdonan? 
  4. Minister Presidènt Rhuggenaath por fasilitá Parlamento di Kòrsou e kantidat di organisashonnan lokal i internashonal ku a hasi uso di Kòrsou komo Hub Humanitario i nan resultado? 
  5. Minister Presidènt Rhuggenaath por informá Parlamento si akaso Curinde a hunga un ròl den e hub humanitario basá riba e akuerdo ku USA? Si esaki ta e kaso, Minister Presidènt Rhuggenaath por duna informashon kon esaki a bai?
  6. Minister Presidènt por informá  Parlamento si Kòrsou lo kontinuá komo hub humanitario pa nos hermana pais Venezuela, bou di e kriterionan ku Parlamento tambe a sostené? 
  7. Minister Presidènt Rhuggenaath por konfirmá ku e produktonan di fundashon Venex a kaduká i a keda distruí? Si esaki ta e kaso, Minister Presidènt Rhuggenaath por informá Parlamento dikon no a laga e produktonan keda usá pa nesesidatnan humanitario lokal? Gobièrnu di Kòrsou i/òf outoridatnan lokal a duna asistensia pa usa e produktonan pa ayudo humanitario lokal?

Atentamente,

 

 

 

Ana Maria Pauletta

Miembro di Parlamento Partido Alternativa Real 

This site uses Akismet to reduce spam. Learn how your comment data is processed.

error: Content is protected !!
%d bloggers like this: