Prome Minister Evelyn Wever-Croes: ‘100 INNOVATIONS’ TA E PLATAFORMA PA HUNTO NOS INNOVA NOS ARUBA DEN UN ISLA DI SOLUCION
Prome Minister Evelyn Wever-Croes:
‘100 INNOVATIONS’ TA E PLATAFORMA PA HUNTO NOS INNOVA NOS ARUBA DEN UN ISLA DI SOLUCION
Dialuna mainta den conferencia di prensa di Gobierno di Aruba, Prome Minister hunto cu e hoben Amedee Wever di FUTURA a anuncia y elabora riba un proyecto di innovacion cu Gobierno di Aruba hunto cu FUTURA ta lansa. Aruba ta pasando den retonan nunca antes bisto. Pa bin cu solucionnan pa e retonan aki lo tuma esfuerso di nos tur pa innova y cultiva ideanan nobo.
‘100 Innovations’, 100 idea y proyecto di innovacion, ta un competencia cu ta habri pa tur ciudadano di nos isla y tur organisacion. E meta ta pa encurasha tur hende pa forma parti di e solucion y pa trece dilanti nan ideanan nobo of existente cu e meta pa logra 100 idea innovativo y aplicabel pa soluciona e retonan cu nos ta enfrentando como pais pa fin di aña 2020.
E programa aki ta consisti di un competencia nacional y lo inclui 3 ciclo, y cada ciclo lo pone enfasis riba un tema grandi cu ta toca nos communidad, y tambe lo yuda nos logra e metanan sotenibel di nacionnan uni pa 2030, e 2030 U.N. Sustainable Development Goals, cu ta un framework cu nos Gobierno a adopta den nos maneho integral.
Señorita Amedee a elabora riba e proyecto aki y riba e 3 temanan di e competencia di 100 Innovations ta cu ta 1. planeta (nos medio ambiente), 2. e ser humano 3. prosperidad.
(1. planet, 2. people, 3. prosperity).
Mas informacion tocante e competencia di 100 Innovations lo wordo duna den e siguiente dianan y lo ta obtenibel riba pagina di Facebook di FUTURA.
“Cambio no lo pasa di un dia pa otro, pero e ta tuma tempo, confiansa, creatividad y colaboracion di nos tur como ciudadanonan di Aruba pa hunto yega por lo menos 100 innovacion cu nos pais lo por ta orguyoso di dje y cu tempo nos por yega na 1000, 10.000 y cu asina nos, trahando hunto por stimula un mentalidad di solucion y innovacion den nos hendenan y negoshinan. Ohala cu e futuro generacionnan por continua cu e esfuerso aki pa aki 10 aña nos por conta riba 100.000 idea innovativo of mas y cu di e 100.000 ideanan aki por sali por lo menos 1.000 innovacion y solucion concreto di nos mesun hendenan pa yuda nos pais sigui progresa.
Para un banda y critica ta facil, pero bini hunto pa traha riba ideanan concreto y innovativo, esey ta tuma curashi y mi tin tur confiansa cu nos hendenan tin e curashi ey, ta e plataforma nan tin mester. Cu esaki nos ta crea e plataforma cu mester pa nos bini hunto y innova nos Aruba den un Isla di Solucion!
Pa mas informacion bishita e pagina Facebook y Instagram di 100 Innovations cu ta OneHundredAruba.