Reunion positivo i fruktífero entre presidente di CGOA i minister Konket
Reunion positivo i fruktífero entre presidente di CGOA i minister Konket
Geplaatst op 04 March 2020 dor di Ministerio Maneho di Gobernashon, Planifikashon i Servisio Públiko
Willemstad – Sr. prof. dr. ing. Valdemar Maracha i sr. mr. Frank Hanze, respektivamente presidente i visepresidente di CGOA, a hasi un bishita na minister di BPD, sr. drs. ing. Armin Konket. Tabata un reunion den kuadro di preparashon di trabounan relashoná ku ehekushon di e palabrashonnan hasí den e akuerdo di Bramendi. Un reunion ku a tuma lugá den un ambiente positivo i al kaso.
Mérito na esun ku meresé
Sr. Marcha, na inisio di e enkuentro, a ekspresá su apresio pa minister Konket relashoná ku e rekonosementu públiko ku e minister a duna pa ku trabounan ku e plataforma a ehersé i pa e echo tambe ku minister Konket semper ta alkansabel i disponibel. T’asina ku e echo ku e enkuentro ku a kondusí na e akuerdo di Bramendi ta un inisiativa di presidente di CGOA i ku minister Konket a sostené for di un prinsipio i ta satisfecho ku e resultado. P’esei minister Konket a konsiderá ku ta na su lugá pa duna prof. dr. ing. Valdemar Maracha i su sekretariado un elogio públiko.
Puntonan di prioridat pa Gobièrnu: Alsa motivashon i produktividat
E puntonan ku minister Konket ke mira tratá ku prioridat ta esnan ku ya for di aña pasá yüli a keda bosiferá. Minister Konket a tene mas ku 50 seshon di informashon kaminda tur ámtenar ku a deseá esei por a akudí. E seshonnan aki a tuma lugá tantu ku ta posibel na boka di trabou di e ámtenar. Durante di e seshonnan aki a duna splikashon di finansa di públiko i a splika tambe ta kua ta e pasonan ku Gobièrnu tin intenshon di tuma pa alsa motivashon i produktividat den aparato públiko.
T’asina tambe ku kada minister a splika e ámtenarnan di su ministerio i ku ta kai pues bou di su responsabilidat tokante ‘Aanwijzing’ i ‘Groeiakkoord’. Tur empleado públiko ku a deseá por a presensiá e seshonnan. Den e seshonnan ei a splika e kon i di kon di e ‘Aanwijzing’ i ‘Groeiakkoord’, anto a para ketu detayadamente na e aspektonan ku ta toka e ámtenar. Konkretamente a duna splikashon i kontestá preguntanan e.o. tokante:
- ‘Redukshon di dianan di trabou segun ta yega penshun’;
- ‘Frismentu di salario’
- ‘Salida for di aparato tempran i boluntario’;
- ‘Sistema di evaluashon i desaroyo di e ámtenar’;
Despues di a risibí ‘feedback’ i a formulá e proposishonnan, awor mester tratanan den CGOA manera lei ta preskribí.
