Gobièrnu por tuma pasonan nesesario den kaso di abusu di preis riba produkto i/òf servisio

Gobièrnu por tuma pasonan nesesario den kaso di abusu di preis riba produkto i/òf servisio

Geplaatst op 05 March 2020 dor di Ministerio Desaroyo Ekonómiko

WILLEMSTAD- Teniendo kuenta ku e pandemia resien di e vírùs di Corona, nos pueblo tambe a kuminsá tuma medidanan di prekoushon i oumentá higiena pa asina minimalisá ekspanshon di bakterianan infeksioso por lo general pero prinsipalmente na e momentunan aki e bakteria di COVID-19. Mirando esaki, Minister Giselle Mc William huntu ku Ministerio di Desaroyo Ekonómiko(MEO) ta emití un alerta general na komersiantenan lokal kontra posibel maluso di preis riba produktonan básiko di higiena i protekshon personal durante e temporada aki.

Gobièrnu di Kòrsou, pa medio di Ministerio di Desaroyo Ekonómiko, ta regulá preis máksimo pa produktonan di promé nesesidat pa medio di e Makutu Básiko. Sinembargo gran parti di e produktonan ku ta keda usá pa higiena i protekshon personal kontra bakteria no ta kai bou di e Makutu Básiko aki. Apesar di esaki, nos lei i reglamentunan pa loke ta trata regulashon di preis di produkto i servisionan (PB 1961 no 117) ta duna Gobièrnu e espasio pa por tuma medidanan nesesario si akaso konstatá ku komersiantenan ta apliká preisnan eksorbitante basá riba e demanda ku a surgi resien.

Artíkulo 2 di e lei aki ta indiká ku minister lo por prohibí pa bende, hür òf ofresé e produkto òf servisionan enkuestion na un preis mas haltu òf mas abou di loke esaki disidí. Lokual ta nifiká ku den un kaso similar e komersiante lo ta obligá na tene su mes na e preis stipulá pa minister.
Teniendo kuenta ku interes general den prevenshon di ekspanshon di vírùsnan manera esun ku mundu ta konfrontá aktual, un oumento di preis di produktonan di higiena i protekshon personal ta violá tantu kódigonan moral komo tambe leinan eksistente di nos pais. Minister di Desaroyo Ekonómiko, sra Giselle Mc William ta enfatisá den e kaso aki ku ta di sumo importansia pa apesar ku nos ta den un merkado liber, komersiantenan lokal atené nan mes na preisnan hustu i rekto pa loke ta trata produktonan pa higiena i protekshon durante e temporada aki.
Den e dianan benidero minister Mc William a indiká na e tim di inspekshon di e ministerio pa intensifiká kontrolnan i paga èkstra atenshon na iregularidat den preisnan durante kontrolnan rutinario ku e tim ta ehersé. Tantu e minister komo tambe ministerio di Desaroyo Ekonómiko sinembargo ta hasi un yamada na pueblo tambe pa duna un man den esaki. Si akaso komo konsumidó bo tuma nota di un oumento di preis eksorbitante riba produktonan pa higiena i kuido personal, alertá nos di esaki mandando un whatsapp na +599 9 511-1444.
Na final semper hasi un eskoho sabio na unda bo ta gasta bo plaka. Si den un establesimentu bo nota ku e preisnan ta eksorbitantemente haltu, bo por skohe semper pa gasta bo plaka na un establesimentu diferente.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: