RBI Softball Curaçao a ranka Sali ku hopi entusiasmo Ashanty Alexandre (Tigers) a sali gana tur 4 wega pichá
RBI Softball Curaçao a ranka Sali ku hopi entusiasmo
Ashanty Alexandre (Tigers) a sali gana tur 4 wega pichá
WILLEMSTAD – Temporada di RBI Softball Curaçao a ranka sali den fin di siman tras di lomba ku un kantidat di 8 wega entre e 4 ekiponan partisipante, White Sox, Red Sox, Braves i Tigers. Aktividat a kuminsá for di djabièrnè atardi na momentu ku a entrega kamiseta i pèchi. Presidente di Curaçao Little League Softball, Ruisandro Cijntje a hiba palabra un ratu i a mustra riba e importansia di disiplina, rèspèt i tende. Tambe a toka e punto pa ta fleksibel paso ta hopi sakrifisio a hasi pa e kampionato tuma lugá. Sigur pa karga ku e weganan dòbel i ku a traha duru pa por yega e meta.
Pa loke ta trata e weganan mes den e promé wega djasabra Tigers a gana Braves ku skor di 8-1. Picher ganadó tabata Ashanty Alexandre i picher pèrdèdó tabata Magenta Bernadina. Pa Tigers, 3 bateadó a bai di 3-2, Paulina, Gil i Alexandre. Pa Braves, Kaisha Look a bai di 1-1. Seguidamente Braves a gana Red Sox 12-3. Picher ganadó tabata J’Dah Girigorie miéntras ku Arjenette Bernardus-Wernet a resultá e pèrdèdó i a konektá e úniko hit di su ekipo. Mihó bate pa Braves tabata Abigail Isabella di 3-2. Despues Tigers a gana White Sox 19-18. Picher ganadó tabata Ashanty Alexandre atrobe i picher pèrdèdó tabata Anais Piar. Mihó bateadó pa Tigers tabata Thanysha Gil di 3-2. Pa White Sox, Fayandra Martis a bai di 5-4. Den e último wega di djasabra White Sox ta logra bòns bek i gana Red Sox 10-3. Picher ganadó tabata Melany Castro Arias miéntras ku Joanni Benita a resultá pèrdèdó. Anais Piar i Joanna Benita a bai di 2-2 pa White Sox miéntras ku Nadine Pardo a bai di 2-2 pa Red Sox.
Djadumingu den promé wega Braves a gana White Sox 13-9. Picher ganadó tabata Kaisha Look miéntras ku Darlyse Salesia a pèrdè. Miho bate pa Braves tabata Gabrielle Verkerk di 3-2. Fiho bate pa White Sox tabata vários hungadó ku a bai di 2-1, Winklaar, Piar i Castro Arias. Despues White Sox a gana Red Sox 5-3 i Tigers a blankea Braves 6-0. Picher ganadó pa Tigers tabata Ashanty Alexandre i e picher pèrdèdó di e wega aki tabata J’Dah Girigorie. Mihó bate pa Tigers tabata Thanysha Gil di 1-1. Pa Braves Maximiliana i Isabella ámbos a bai di 1-1. Den wega final di fin di siman Tigers a gana Red Sox 7-1. Ashanty Alexandre a simplemente dominá atrobe pa asina gana tur su di 4 weganan tira den solamente un fin di siman. Picher pèrdèdó tabata Joanni Benita. Mihó bate pa Tigers Lyanne Rijnschot di 3-2 i Hooi i Bernardus-Wernet a bai di 2-1 pa Red Sox.
E kampionato di RBI Softball Curaçao ta kontinuá fin di siman próksimo ku vários wega na Post 6. Curaçao Little League Softball, Fundashon Pa Nan i Curaçao Baseball Development Foundation ta sumamente kontentu manera e promé fin di siman di RBI Softball Curaçao a desaroyá.
