E Famia Sablika a presentá pa Seú 2020 “E Poder di Mama Tera”
E Famia Sablika a presentá pa Seú 2020 “E Poder di Mama Tera”
Djabièrnè anochi huntu ku un tremendo públiko, kompaña pa músika di Grupo Rítmiko Sablika, E Famia Sablika a presentá nan trahe ku nan lo desfilá kuné den marchanan di Seú 2020 bou di e tema “E Poder di Mama Tera”.
La Hacienda Olivia a brinda nos nan espasio pa nos por a presentá e parti general di nos trahe, ku ta konsistí pa e damanan tres kolo básiko ku ta e hel, oraño i kòrá. I pa e hende hòmbernan su trahe ta di kaktus i riba nan lomba un koto pa nan por karga palu òf datu aden.
Na momento di presentá e trahe tabata tin oportunidat pa inskribí i na final di e anochi esaki a será tambe pa loke ta Seú 2020 huntu ku e Famia Sablika. Shurendi Pieternella a anunsiá ku Grupo Rítmiko Sablika lo ta den Kantadó Mayó 2020, nan lo presentá djamars 24 mart komo no.6 pa e anochi ei.
Pa e aña aki tambe Sablika lo ta bon representá den Elekshon Reina Seú 2020, ku partisipashon di srta. Ingemay Pieternella partisipante no. 2. Elekshon lo tuma lugá di 21 mart próksimo den Curaçao Festival Center pa 8’or di anochi.
E Famia Sablika kier a yama danki spesial na sra. Germaine Hart, sr. Hennie i nan personal pa e bon trato ku nos a risibí riba e anochi aki i pa a habri porta di La Hacienda Olivia Plantation pa nos. Danki di kurason.
Riba e fotonan por apresiá momentu de presentashon di Trahe pa Seú 2020.
