“Maduro & Curiel’s Bank ta prepará pa COVID-19”

“Maduro & Curiel’s Bank ta prepará pa COVID-19”

Maduro & Curiel’s Bank ta prepará

 

Ku hopi interes i atenshon MCB (Group) ta sigui opservá e evolushon i desaroyonan di e Novel Corona Virus (COVID-19) i medidanan i aviso di outoridatnan lokal.

Bienestar general i nos relashon ku nos klientenan ta masha importante pa nos i nos lo hasi tur lo posibel pa sigui brinda e servisionan ku Bo a kustumbrá di nos, tambe den e periodo difísil aki.

 

Salú i seguridat di tantu nos empleadonan i nos klientenan ta keda nos prioridat, mientras nos ta sigui prepará pa por keda brinda nos klientenan e produkto- i servisionan deseá.

 

Pa e motibu aki nos a aktivá nos “Plan di Kontinuidat di Negoshi” i a anunsiá interno algun medida operashonal ku nos a tuma pa protehá nos empleadonan di e riesgonan asosiá ku e Corona Virus. Tambe nos a tuma nota ku outoridatnan a anunsiá ku “distansiamentu sosial” ta un di e mihó maneranan pa baha e riesgonan ku e vírus por plama den un komunidat. 

 

P’esei MCB Group a disidí entre otro pa restrihí biahenan, repartí diferente tim di personal ku ta traha huntu den diferente departamentu esensial den Banko inkluso traha na kas, kanselá eventonan grandi i pone atenshon spesial na higiena pa medio di informashonnan ku nos ta kompartí internamente ku nos empleadonan. Tambe nos ta antisipá ku nos lo será i eliminá akseso na algun di nos edifisio- i brènchnan e siman aki.

 

Gustosamente nos ta pidi nos klientenan pa hasi mas uso posibel di sistemanan elektróniko (òf di distansia) pa Bo servisionan bankario i di pago, manera Online Banking i Mobile Banking, paga ku tarheta di Bankomatiko, usa SMS 1111 pa rekargá bo telefon i hasi mas uso di nos Bankomatikonan.

 

Nos ta sigui intensivá nos seguridat pa protehá nos Banko i nos klientenan den e momentunan aki tambe kontra riesgonan sibernétiko (cyber risks) i menasa i/òf intentonan di falsifikashon (menasa di froude).

 

Nos ta supliká un i tur pa sigui e anunsio- i instrukshonnan di ofisialnan di gobièrnu i salubridat, pa kuida kurpa i pa kuida otro. MCB (Group) lo keda vigilá e situashon ku koutela, sigui prepará pa kualke desaroyo i pa asina garantisá kontinuidat di nos servisionan.

 

Keda pendiente pa mas informashon di Maduro & Curiel’s Bank.

Pa kualke informashon semper por yama nos na 466 1111 òf  bishitá nos wèpsait www.mcb-bank.com.

 

Willemstad, 16 di mart 2020

This site uses Akismet to reduce spam. Learn how your comment data is processed.

error: Content is protected !!
%d bloggers like this: