CRU TA REDUSI E KANTIDAT DI PERSONAL KU TA LABORA DIARIAMENTU RIBA PLANTANAN DI REFINERIA PA PROTEHA SALU DI SU PERSONAL

CRU TA REDUSI E KANTIDAT DI PERSONAL KU TA LABORA DIARIAMENTU RIBA PLANTANAN DI REFINERIA PA PROTEHA SALU DI SU PERSONAL

Willemstad 17 di Mart 2020- En bista di e situashon ku nos pais ta konfrontá ku COVID-19 Curaçao Refinery Utilities (CRU) a opta pa redusí e kantidat di personal ku ta akudí na boka di trabou diariamente. 

Tur empleado ta keda mantené nan kòntrakt laboral i ku garantia di pago di salario.  CRU a tuma e paso aki pa asina perkurá ku su personal ta keda ménos posibel eksponé na kontaktonan ku terser, inkluso riba tereno di trabou.  Esaki ta kuadra tambe ku e esfuerso nashonal mayó pa limitá kontaktonan personal i asina evitá potensial posibilidat pa e vírus por plama den nos komunidat.  Gerensia, na momentu di tuma e desishon aki, a tene debido kuenta ku e loke mester tin na personal riba planta pa perkurá pa seguridat i funshonamentu di e plantanan pa sigurá kontinuidat di suministro di kombustibel pa Kòrsou.

  

Un kuerpo di personal salú ta importante na momentu ku nos refineria mester bolbe drenta bèk den funshon.  P’esei tambe e medida aki di prekoushon. Kada persona lo keda notifiká pa su superior direkto na ki momentu su presensha ta rekerí pa perkurá pa kontinuidat. Na mes momentu CRU a hasi un apelashon na su personal pa siguí e rekomendashonnan di outoridatnan pa asina konservá nan mes salú, i salú di nan ser nan kerí.  

Gerensia di CRU ta sigui vigilá  e situashon ku nos refineria, meskos ku Kòrsou komo parti di mundu ta konfrontando.