Frakshon di MAN a entregá inisiativa di lei “Flexibel Werken”

Frakshon di MAN a entregá inisiativa di lei “Flexibel Werken”

 

Riba 11 di mart último Frakshon di MAN a entregá e proyekto di lei ‘Flexibel Werken’ riba inisiativa di Parlamentario Elsa Rozendal. E filosofia tras di e inisiativa di lei aki ta ku e ta fasilitá e trahadó p’e por kombiná trabou, bida di famia i su tareanan (di kas) mihó. E lei, na momentu ku e bira vigente, ta regla ku un trahadó por hasi petishon na su doño di trabou p’e por traha oranan mas flèksibel, por ehèmpel, kambio di orario di trabou riba un dia (‘arbeidstijd’) òf kambio di kantidat di ora ku e ta traha pa siman (‘arbeidsduur’), loke nan ta yama tambe (‘parttime’) i òf traha un dia for di kas (‘thuiswerken’). E doño di trabou ta evaluá e petishon di su trahadó i alabes evaluá tur e posibilidatnan ku tin pa realisá e petishon ku a keda hasí. Rechaso di un petishon por solamente si tin basenan hopi bon fundá. Simplemente bisa e trahadó ku no por hasi adaptashon di su oranan di trabou, no ta posibel, segun e proposishon di lei.

 

Parlamentario Elsa Rozendal, ta splika ku ora e lei “Flexibel Werken” bira vigente, un trahadó tin e flèksibilidat pa repartí su oranan di trabou di tal forma ku e ta traha mas efisiente. Ademas e trahadó ku ta traha flèksibel ta mas satisfecho ku su trabou. For di un estudio hasí pa ”Wolfson Research Institute” a keda demostrá ku un trahadó ku por traha flèksibel ta mas salú i mas produktivo. E ta menos di stress i esaki ta pone ku e ta mentalmente i fisikamente mas saludabel.

 

E lei ta un bentaha hopi grandi tambe pa e grupo di mama i tatanan soltero. Pa hopi mayor soltero ku ta traha, e ta un kore kore mainta pa hiba yu skol i mèrdia ora di buska yu for di skol. Mester yega kas kushiná i bai trabou bèk na ora òf pasa buska kuminda i hiba yu opvang. Trahando oranan flèksibel, por yuda aliviá e situashon aki.

 

Otro bentahanan di e lei aki ta ku e por habri kuponan di trabou pa hendenan ku ke traha “parttime”, e ta eliminá presensia obligatorio di ocho ora riba un dia na boka di trabou i asina redusí gastunan di utilidat pa e doño di trabou i e por aliviá kongestion di tráfiko tur mainta i atardi durante e asina yamá ‘spitsuur’. Rozendal ta indiká ku traha flèksibel ta benefisiá e klase trahadó, en espesial e mama i tata soltero pero tambe doño di trabou i komunidat kompleto. Si e lei aki tabata vigente hopi prekupashon ku nos tin awe, kousá dor di e viro di Corona pa loke ta kon ehersé nos trabou, lo no tabata nesesario.

 

Awor ku a entregá e inisiativa di lei aki na Parlamento, e proseso ta kuminsá pa e lei bai e instansianan manera SER i Konseho di Konsulta (Raad van Advies) pa despues e por keda tratá den Parlamento pa aprobashon.

 

Pa mas informashon por wak riba: http://www.elsarozendal.com/flexibel-werken.html