Fundashon Nos Grandinan i Fundashon Pro Bista Social Distancing no mester kondusí na Social Isolation

Fundashon Nos Grandinan i Fundashon Pro Bista

Social Distancing no mester kondusí na Social Isolation

 

Manera nos tur ta na altura, e virus di Corona a sorprendé mundu kompletu manera un ladron di anochi. Tur suidadano rond mundu por ta vulnerabel na e virus aki, pero esnan mas vulnerabel ta nos grandinan riba 60 aña i tambe personanan ku tin problema ku bista. Grandinan riba 80 aña ta esnan aun mas vulnerabel i pa no lubidá, hopi vulnerabel ta tambe e grandinan ku tin kondishonnan médiko, manera p.e. problemanan di kurason, pulmon, kanser, suku, Parkinson, nier, astma i dementia. Aparte di nos grandinan, personanan ku tin problema ku bista tambe ta vulnerabel, mirando ku nan ta hasi uso di nan otro sentidonan pa por funshoná mas independiente posibel, e.o. fula, skucha, hole i purba—esaki ta debí ku nan no por konfia e bista mas. Pues usando nan mannan pa fula i tambe nan olfato pa konfirmá i identifiká artefakto ta hasi e personanan aki súmamente vulnerabel pa e virus aki, kaminda higiena ta esensial pa evitá kontiminashon. 

 

Fundashon Nos Grandinan i Fundashon Pro Bista a uni forsa pa trese informashon na nos gruponan di enfoke. Na promé lugá, nos ta supliká pa nos grandinan i tambe personanan ku limitashon visual sigui e ruedanan di prensa ku gobièrnu tin diariamente na e planta di televishon òf radio di nan preferensha. Tambe ta importante pa laba man konstantemente ku awa i habon ipor usa hand-sanitizer of produkto ku ta kontene 70% di alkohòl komo èkstra prekoushon. Preferibel tosa òf niester den un tissue (kaba tira esaki afó inmediatamente) òf tosa i/òf niester den elleboog. Pues mantenshon di higiena ta di sumo importansha i alabes sigui perkurá pa kome sufisiente i saludabel, inkluyendo fruta i bèrdura den kada menú. Ta rekomendabel pa bebe vitamina pa mantené e sistema imunológiko na unnivel  haltu.

 

Distansia sosial (social distance) ta hopi importante i ta sirbi komo protekshon propio kontra e virus aki i tambe social distance ta sirbi pa bo protehá bo próhimo. No opstante, social distance no mag kondusí na social isolation (isolashon sosial). Hende grandi i tambe personanan ku tin problemanan visual mester di yudansa sin duda. Pa nan no ta un bon idea pa nan ta isolá. Isolashon ta trese kuné problemanan emoshonal, manera e.o. tristesa, depreshon, angustia i te hasta dementia. Fundashon Nos Grandinan i Fundashon Pro Bista ta pidi famia i personanan ku ta kuida e hende grandi i personanan ku limitashon visual pa por fabor tene èkstra na kuenta e tepnan duná dor di gobièrnu huntu ku su profeshonalnan den medisina, ya asina huntu nos por salbaguardiá e kuido di e grupo èkstra vunerabel aki i  alabes pa evitá ku e virus por plama den nos komunidat.