Solidario, siguiendo instrukshon nan di higiena i kedando den nos kas, Pueblo di Kòrsou lo vense e enemigu invisibel ku yama Covid-19

Karta habri di parti di Gilmar “Pik’ Pisas na pueblo di Korsou

 

Apresiabel Pueblo di Kòrsou,

 

Solidario, siguiendo instrukshon nan di higiena i kedando den nos kas,

Pueblo di Kòrsou lo vense e enemigu invisibel ku yama Covid-19

 

Frakshon di MFK pa medio di e karta aki ta aserka kada un di bo(so) ku sentimentu di solidaridat i konvensí ku si kada un di nos komportá nos mes manera indiká nos lo por kontené e pandemia di Covid-19, ku ta afektando mundu kompleto.

 

No tin espasio pa nos odia, no tin espasio pa nos trata di saka probecho di e situashon aki, no tin espasio pa nos ta rabia ku otro i kritiká otro. Nos mester krea espasio den nos mente i kurason pa nos stima nos famianan i stima nos próhimo, nos mester ta “watchdog” pa koregí esnan ku nos ta mira ku no ta kuidando nan mes i ku e posibilidat di por kontagiá otronan.

 

Esaki ta e momentu pa nos uni den famia i pa nos rekuperá i drecha hopi kos ku durante di tempu nos a laga nan deteriorá den nos kas, famia i trabou. Ta e momentu pa nos reflekshoná i realisá ku bida no ta di nos, ku pober òf riku tin e mesun balor riba e mundu aki i ku malesa no konosé rasa ni religion.

 

Ban drecha nos biba, ban siña di e momentonan difísil aki. E vírus aki a kosta bida di masha hopi siudadano rònt mundu di kual frakshon di MFK ta lamentá esaki. Pero esnan ku a bai, ta esnan ku a wòrdu sakrifiká pa lanta nos, ku a keda na bida riba e mundu aki for di soño.

 

Corona Vírus no ta djis un vírus, ku ta hasi bo malu i ku tin algun ku por muri teniendo e vírus aki. Corona vírus ta mas ku malesa, e ta un mensahe pa kada un di nos siña for di dje i realisá ku bida ta muchu mas ku sèn, ku bida ta nifiká kompartí, stima i biba bon ku bo próhimo.

 

Frakshon di MFK ta tuma e situashon aktual komo un mensahe i enseñansa pa den futuro nos sirbi bosnan mihó. Pa nos di MFK semper e ser humano ta sentral i awor mas ku nunka, nos lo aportá mas den e ámbito polítiko pa nos yunan di Kòrsou ta sentral den kualkier desishon òf situashon.

 

Frakshon di MFK a komprondé ku djaluna próksimo gobièrnu di Kòrsou lo presentá un pakete di ayudo/medida ku lo mester yuda tur siudadano, debí ku e situashon aki ta nos sea sosialmente òf finansieramente.

Nos di frakshon di MFK lo warda e pakete ku gobièrnu lo presentá i di un forma konstruktivo nos lo duna gobièrnu di Kòrsou nos komentarionan riba e pakete aki.

 

Pa frakshon di MFK ta importante pa e siguiente puntonan ta parti di e pakete di alivio;

 

  • Habri awa deskonektá di tur siudadano i no solamente di esnan ku ta registrá na SOAW
  • Adaptashon i/òf posponé pago di awa i koriente. Tene kuenta ku ta pidi pa famianan keda kas mas tantu posibel i esaki lo oumentá konsumo di awa i koriente di famianan
  • Kompensashon pa esnan ku a pèrdè trabou pa motibu di e situashon aki
  • Dispensashon di 3 luna pa pago di kualkier tipo di fiansa, sea ta na un banko òf na kualkier otro instansia òf negoshi partikular
  • Dispensashon di 3 luna pa pago di hur di kas òf apartamento
  • Baha tarifa di rekohé sushi di Selikor bek na 25,= florin pa luna
  • Adaptá tarifanan di telekomunikashon pa famianan por komuniká ku otro

 

E puntonan ariba menshona segun frakshon di MFK no por keda for di un pakete di alivio. E tres lunanan di dispensashon menshoná, mester wòrdu paga bek den un término di 2 aña despues ku gobiernu di Kòrsou anunsiá ku e situashon a normalisá.

 

Movementu Futuro Kòrsou ta solidario ku pueblo di Kòrsou, uni i kumpliendo ku e instrukshon nan, Kòrsou lo vense Covid-19.

 

Kòrsou 22 di mart 2020,

 

Gilmar “Pik” Pisas

Lider di Frakshon

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: