Boto ku un kantidat di persona indokumentá a bordo ta senk na kosta di Venezuela

Personanan indokumentá a sali Venezuela direkshon pa Aruba, sinembargo nan no a yega nan destinashon.

Un boto a sali for di Paraguaná, Venezuela ku direkshon pa Aruba durante e fin di siman di 13 pa 15 di mart ultimo. A bordo tabata tin un gran kantidat di persona indokumentá. Komo ta trata di un transporte ilegal no ta konosí kuantu persona eksakto tabata tin a bordo. Tabata tin adulto i mucha entre e personanan. E kantidat ta alrededor di 19 persona. E boto a sali Venezuela pero no muchu leu di kosta di Venezuela e boto a senk. Aparentemente e personanan na kabes, e kapitan huntu ku probablemente dos persona mas, a logra skapa for di riba e boto. Djadumingu un kurpa a keda enkontrá na kosta di Guajira i esaki a keda asosiá ku e boto ku a senk. Pa medio di su pañanan por a identifiká e kurpa komo David Rafael Revilla Colina ku tabata riba e boto. Djaluna i durante dianan siguiente a enkontrá mas kurpa loke ta duna indikashon ku mayoria di e personanan a bordo a pèrdè nan bida den laman. Probablemente e kapitan a keda detené mientras un di su kompañeronan a logra hui.