WILLEMSTAD – Dia promé di yüni 2020 Scouting Antiano ta konmemorá i selebrá 90 aña di eksistensia na Kòrsou. Nos por mira bèk riba 90 aña di desaroyonan positivo, retonan, aventuranan, ambishonnan i mas ku tur kos, 90 aña di formashon pa bida. 

 

Desaroyonan di Scouting na Kòrsou

Tabata promé di yüni 1930 ku riba inisiativa di Carl Nicolaas Winkel (Shon Cai) e promé grupo di Scouting yamá Briongroep situá na Rif a mira lus di dia aki na Kòrsou. E tempu ei komo parti di de Nederlandse Padvindersvereniging sekshon Curaçao (N.P.V.). Despues N.P.V. a kontinuá komo de Antilliaanse Padvinders Vereniging (A.P.V.). 5 aña despues ku N.P.V. a keda fundá,  Frater Antinus, Harry da Silva i Joop van Geffen na aña 1935 a  lanta  de Katholieke Verkenners (K.V.) i a lanta grupo St. Tharcisius komo e promé grupo di K.V. 

Den transkurso di añanan tantu A.P.V. komo K.V. a sigui desaroyá i diferente grupo a lanta i forma parti di e dos organisashonnan. Despues di basta aña di kombersashon a uni e organisashonnan A.P.V. i K.V. i pa promé di yanüari 1997 Scouting Antiano a bira operashonal komo susesor di e 2 organisashonnan. 

Algun punto kulminante pa Scouting Antiano den e último 10 añanan ta:

• Caribbean Cuboree organisá na aña 2010,
• Caribbean Jamboree organisá na aña 2014, i
• Scouting Antiano a bira miembro kompletu di  World Organization of the Scout Movement (WOSM) na aña 2016.

Tambe Scouting Antiano ya a organisá 4 edishon di un kampamentu di liderazgo (Dutch Caribbean Leadership Training) ku e ophetivo pa empoderá hóbennan pa ta lidernan fuerte den nos komunidat. 

Aktualmente Scouting Antiano ta konta ku mas òf ménos 1300 miembro repartí den 21 grupo aktivo den diferente bario rònt Kòrsou, unu na Boneiru i unu na St. Maarten. 

 

Kiko ta Scouting?

Hopi biaha nos ta asosiá Scouting ku solamente kampamentu, sendementu di kandela, maramentu di kònòpi i kaminatanan den mondi (hike).

Sinembargo, scouting ta enserá muchu mas. Scouting ta edukashon pa bida. Scouting ta un movementu edukashonal no-formal, ku ta komplementá famia i skol i ku ta traha riba desaroyo integral i kontinuo di su miembronan. Pues, Scouting ta un movementu edukativo, boluntario i neutral ku ta yuda su miembronan desaroyá nan potensial emoshonal, intelektual, físiko, sosial i spiritual kompletamente. Nos ta traha riba e desaroyonan ariba menshoná ku un proyekto edukativo ku ta basá riba 6 área di kresementu. Trahando riba e áreanan di kresementu aki, nos ta yuda nos miembronan bira personanan komprometé, responsabel, outónomo i solidario; esakinan tur segun kada un su kapasidat máksimo. Ta importante enfoká ku kada Scout ta desaroyá su mes segun su kapasidat máksimo, pues e eksperensia di Scouting ta diferente pa kada miembro. Pa e motibu ei, awe nos por mira Scoutnan den diferente funshon prominente hasiendo loke nan por hasi di e mihó manera ku nan por. 

 

Tambe Scouting ta eksponé su miembronan na diferente oportunidatnan úniko pa inspirá nan pa ta siudadanonan aktivo den komunidatnan lokal, regional i mundial p’asina nan por tuma akshonnan ku ta kondusí na un mundu mihó. 

Pa loke ta e plano internashonal, ta importante menshoná ku kada 4 aña ta tuma lugá un World Scout Jamboree unda Scoutnan di rònt mundu ta topa, interkambiá di idea i risibí  empoderashon pa hasi kambio. Puntra un Scout ku a partisipá na un World Scout Jamboree kon el a eksperensiá esaki i wak awe kon e ta aportando na su komunidat. 

Pa djis duna un ehèmpel chikitu kon scouting ta duna su miembronan e oportunidat pa desaroyá nan kapasidat máksimo, nos ta invitá boso subi e kanal di youtube “Scouting Antiano” i mira kon nos scoutnan mes a plania, produsí i kompartí un vidio na okashon di selebrashon 90 aña Scouting na Kòrsou. 

Pa mas informashon di nos organisashon bo por subi nos página wèp Scoutingantiano.org. Nos ta gradisí pueblo di Kòrsou pa a aseptá nos e último 90 añanan i nos ta spera di por sigui konta ku sosten di komunidat pa huntu nos sigui traha riba desaroyo di nos hubentut.