Maduro & Curiel’s Bank ta informá: informashon ofisial di un kaso positivo di COVID-19 di un kolega ku ta traha den na nos MCB Brènch na Saliña.

Maduro & Curiel’s Bank ta informá

Nos a haña informashon ofisial di un kaso positivo di COVID-19 di un kolega ku ta traha den e area ku ta trata ku kliente ku tabatin sita kaba pa habri kuenta òf hasi fiansa, na nos MCB Brènch na Saliña.
E último dia di trabou di e kolega akí tabata djabièrnè 20 di mart 2020.

Tuma nota ku en konekshon ku prekoushon ku nos Banko a hasi inisialmente, Saliña brènch tabata forma parti di e 6 brènchnan ku nos a sera for di djárason 18 di mart, netamente pa mitigá riesgonan pa kliente i empleado. Despues a opta pa laga Saliña brènch habrí solamente pa klientenan ku ya tabatin sita pa habri kuenta, hasi fiansa òf tuma tarheta.

Pa e motibu aki, gerensia di Maduro & Curiel’s Bank a tuma e desishon pa sera e brènch kompleto imediatamente entrante djaluna 30 di mart 2020, te próksimo aviso, i inisiá e proseso di limpiesa i desinfektashon profundo (deep cleaning) na nos brènch na Saliña.

Nos ta lamentá ku nos ta konfrontá e situashon aki.

Tambe nos ta trahando huntu ku outoridatnan di Salubridat lokal riba e kaso spesífiko aki i e situashon general.
Nos lo sigui mantené e eksigensianan di nos ofisialnan di salubridat i ta pidi henter nos komunidat pa mantené e reglanan stipulá pa nos mes i esnan rondo di nos ta seif. Den e tempu asina aki nos mester demostrá komprenshon, sigui instrukshon probá pa kuido di salú i ahustá nos akshonnan pa mantené nos mes, esnan ku nos ta stimá i esnan rondo di nos, salú i seif.

Mientrastantu, nos ta sigui suprayá pa un i tur ehersé distansiamentu sosial, i mas ku tur kos laga nos sigui sostené i apoyá otro.

Na mes momentu nos ta deseá nos kolega un pronto rekuperashon; huntu nos tin’é den orashon.

29 di mart 2020.