Minister Jesus-Leito a bishita Lanthùis Kortijn pa asina tuma nota di trabounan.

Minister Jesus-Leito a bishita Lanthùis Kortijn pa asina tuma nota di trabounan.

 

Willemstad –  Minister Jesus-Leito a hasi bishita na Lanthùis Kortijn pa asina tuma nota di e trabounan ku a tuma lugá pa sera pasashi rondó di e Lanthùis aki. E medida aki tabata nesesario despues ku djadumingu 29 di mart deskonosínan a sende bola di sushi na kandela riba tereno di e Lanthùis ku ta situá den área di Otrobanda. E kandela aki a sòru pa daño na e edifisio.

 

Despues ku outoridatnan konserní a kaba di paga e kandela i hasi investigashon nesesario, Minister Jesus-Leito a duna òrdu pa limpia rondó di e Lanthùis i sera esaki su pasashinan pa evitá ku algu similar por bolbe sosodé. 

 

Ministerio di Tráfiko, Transporte i Planifikashon Urbano  (VVRP) ta e ministerio enkargá ku atministrashon i maneho di tereno públiko, maneho di propiedat inmóbil di Gobièrnu, i mantenshon di edifisionan di pais Kòrsou. VVRP ta hasi esaki pa medio di Servisio pa Atministrashon i Maneho di Tereno Públiko (Domeinbeheer).

 

Minister Jesus-Leito ta lamentá ku un suseso asin’aki a tuma lugá. Nos Lanthùisnan ta símbolo di nos historia i aparte di esaki nan ta edifisionan kual e restorashon ta unu kostoso. Minister Jesus-Leito ta hasi un yamada na pueblo di Kòrsou pa ban kuida nos propiedatnan. Na momentu ku kualke persona tin nesesidat di deshasí di sushi, akudí na e instansianan konserní pa hasi esaki.