KAMARA DI KOMERSIO TA KONVENSI KU E APORTE PROPIO BANDA DI YUDANSA DI LIKIDES TA UN BON KOMIENSO PA ENFRENTA FUTURO

KAMARA DI KOMERSIO TA KONVENSI KU E APORTE
PROPIO BANDA DI YUDANSA DI LIKIDES TA UN BON
KOMIENSO PA ENFRENTA FUTURO

Willemstad—E kuadro di asistensha di likides ku Korsou a risibi for di
Reino ta duna empuhe importante na inisio di un proseso den kual Korsou
ta reorganisa su asuntunan pa asina nos sali fuerte for di e krisis aktual, i lo
por enfrenta retonan den futuro ku nos por hanja nos konfronta kune.
Punto importante ku a keda trese dilanti ta e responsabilidat propio di parti
di Korsou pa aporta na e solushonnan ku Korsou mes a presenta. Esei ta
konfronta nos ku e nesesidat pa hasi aworaki sakrifisionan dor di entre otro
atende ku gastunan di gobernashon i tur otro duna un aporte na un manera
solidario pa por yuda tur ku tin mester di yudansa. Esei ta ensera tambe
redukshon di kantidat di oranan di trabao pa empresanan realmente por
sobrebibi e krisis actual di coronavirus i asina skapa kuponan di trabou.
Ta ora pa basha un fundeshi riba kual lo mester lanta e panorama
ekonomiko di nos pais pa futuro serkano, kuminsando for di awor dor di
sigui di ta kreativo manera nos a demostra di por ta den e ultimo simannan.
Nos a hanja solushon pa kosnan ku semper a parse sin solushon, i nos tur ku
tabata por no a para ketu i a sigui dilanti na maneranan inovativo. Kamara di
Komersio ta aplaudi e inisiativanan aki i tur e otronan ku ta fiha riba un
miho futuro.
Kamara di Komersio ta hasi un yamada na tur pa sera kabes i tuma desishon
nan difisil awor, pa pasa dor di e parti difisil mas lihe posibel. Mas tantu nos
tarda pa tuma desishon nan difisil mas largu e krisis lo dura pa nos tur. Laga
nos sera kabes, tuma desishon nan fuerte i difisil lihe pa baha gastu nan di
gobiernu dor di baha ora nan di trabou di empleado nan den sektor publiko i
sektor priva. Asinaki tur hende ta karga poko di e dolo i e sen nan di
subsidio ta yega na mas kas di famia ku berdaderamente mester di e ayudo.