Bastante interés pa kumpra kabritu i karné di rasa

Bastante interés pa kumpra kabritu i karné di rasa

Willemstad – Djasabra último tabatin benta di kabritu i karné di rasa na AVB (ántes LVV). Ademas di animalnan di AVB tabatin tambe porko, karné i kalakuna di kriadónan di bestia lokal na benta. Regularmente AVB ta pone benta di kabritu i karné di rasa entre otro pa yuda mehorá rasa di e animalnan lokal. Minister di Salú, Medio Ambiente i Naturalesa dr. Dorothy Piertsz- Janga tambe tabata presente pa personalmente tuma nota di e aktividat.
Komo ku regularmente AVB tin benta di kabritu, den traskurso di añanan a tuma nota di personanan ku ta hasi mal uzo di e sistema pa kumpra e mihó animalnan i mas animal ku lokual ta permití. Pa kombatí esaki AVB a introdusí un sistema nobo kual ta muchu mas hustu di manera ku tur kumpradó ta haña oportunidat igual pa kumpra animal. E sistema hustu aki no a kai den masha bon tera serka algun kumpradó kual a kondusí na un situashon di mal kontentu na inisio pero esaki a keda resolvé.