CBCS ta reuní ku stakeholdernan na Sint Maarten ‘Promé ronda di reunion pa follow-up riba stabilidat finansiero’
WILLEMSTAD/PHILIPSBURG – Tras di a publiká su Financial Stability Report (informe riba
stabilidat finansiero òf FSR) na mei 2022, Centrale Bank van Curaçao en Sint Maarten (CBCS) a
inisiá e promé ronda di reunion pa follow-up ku e stakeholdernan na Sint Maarten. CBCS a reuní
ku e organisashonnan representativo di e bankonan i kompanianan di seguro, Algemeen
Pensioenfonds Sint Maarten, Ministerio di Finansa, Ministerio di Turismo, Ekonomia, Transporte i
Telekomunikashon, i e representantenan di gobièrnu hulandes. E tópikonan prinsipal ku a keda
tratá ta e rapòrt FSR i e plannan pa implementá un sistema di garantia di depósito.
E representantenan di sektor finansiero a ekspresá apresio pa e informashon útil presentá den e
rapòrt. Fuera di esei, e lidernan di sektor por a konfirmá mayoria di e konklushonnan presentá den
e dokumento. Ademas, nan a suministrá informashon aktualisá tokante e último desaroyonan den
e sektor i a ofresé informashon balioso ku por ser inkorporá den e siguiente edishon di FSR.
A papia tambe riba e desaroyonan nobo den sektor finansiero, i esunnan ku ta na kaminda, ku por
tin efekto riba nos stabilidat finansiero. A identifiká inflashon i kambio klimátiko komo dos área di
riesgo pa sektor finansiero di Sint Maarten: e nivel haltu di inflashon, ku ta impaktando henter
sektor finansiero i henter komunidat, i preparashon pa orkan ta dos punto ku ta figurá haltu riba
agènda di e institutonan.
Banda di e rapòrt FSR, pronto CBCS lo ofresé e institutonan finansiero algun informe di benchmark
ku nan por usa komo referensia pa evaluá nan prestashon, komparando esaki ku prestashon di e
otro institutonan den e sektor i ku e normanan ku ta konta pa e sektor, ku e intenshon pa esei sirbi
komo un ‘alerta trempan’.
Ku gran interes, CBCS ta mira padilanti na e siguiente ronda di enkuentro ku stakeholder, ku lo
tuma lugá na Kòrsou.
Willemstad, 24 di yüni 2022
CENTRALE BANK VAN CURACAO EN SINT MAARTEN
