LIBERTAT DI EKSPRESHON NO POR RESULTÁ DEN ECHONAN KASTIGABEL
LIBERTAT DI EKSPRESHON NO POR RESULTÁ DEN ECHONAN KASTIGABEL
E medidanan ku gobièrnu a tuma pa por limitá e krísis di covid-19 ta drástiko. Tambe na Boneiru i den un menor grado na Saba i Sint Eustatius, esaki ta kondusí na hopi reakshon den media, prinsipalmente riba medionan sosial manera Facebook.
Libertat di ekspreshon ta un di e prinsipionan di mas importante den un estado di derecho demokrátiko. Opinion nan ku por ofendé òf preokupá otronan, ta permití. Esaki no ta nifiká ku libertat di ekspreshon ta sin restrikshon. Sinembargo por restringí libertat di ekspreshon bou di sierto kondishon. Esaki ta reglá den EVRM (Konvenio Europeo di Derechinan Humano). Ta trata aki por ehèmpel di echonan kastigabel manera instigamentu, menasa i e asina yamá artíkulonan di ofensa. E echonan kastigabel aki bo por haña nan den Kódigo Penal BES.
Instigamentu ta nifiká stimulá hende pa hasi algu ku ta prohibí. Dor di instigá, un persona por motivá siudadanonan pa kometé un echo kastigabel. Menasá un persona ta kous’é sufrimentu òf violensia. Un insulto ta un ekspreshon ofensivo ku por daña bon nomber di un persona. Si tipo di mensahe nan asina wòrdu publiká, Ministerio Públiko lo duna polis òrdu pa hasi investigashon i lo hasi persekushon penal.
Na Kòrsou den 2019 a hasi denunsia pa difamashon, menasa i instigamentu. Durante transmishonnan di radio i tambe riba Facebook, e sospechoso a hasi un yamada na personanan pa komete violensia. Despues di su deklarashonnan tabatin diferente menasa. Despues di un investigashon a detené e sospechoso. Resientemente tabatin otro persona ku a menasá minister-presidènt via Facebook. E persona aki tambe a keda detené i a traha un prosès ferbal.
