Parlamentario Dokter Marilyn Moses ku preguntanan hasi na Minister di Asuntunan General, Eugene Rhuggenaath tokante preguntanan “85 personal médiko”.
Minister di Asuntunan General i Promé Minister
Señor. Eugene Rhuggenaath
Fort Amsterdam 17
Presente
Willemstad, 24 aprel 2020
Tópiko: Preguntanan tokante 85 personal médiko
Apresiabel señor Rhuggenaath,
Nos a tuma nota den e rueda di Prensa di Gobièrnu di awe, 24 di aprel 2020 ku 1 di e 85 personal médiko ku a yega Kòrsou ayera a tèst positivo.
E binida di e grupo aki for di momentu ku a anunsiá esaki siman pasá a lanta hopi preokupashon den nos komunidat.
No ta kla kiko e balor agregá di e grupo aki ta pa nos komunidat.
Mas pregunta a lanta na momentu ku minister Camelia-Römer ayera den un entrevista na un emisora di televishon a informá pueblo ku e grupo ku ela kaba di risibí ta bini na promé instante pa 45 dia so.
Kòrsou su ekspertonan a hasi un tremendo trabou pa kontené e malesa COVID-19.
E komunidat aki tambe a hasi hopi esfuerso i sakrifisio pa mantené e medidanan di higiena i seguridat durante di e krísis aki. E lockdown tin hopi konsekuensia pa famianan. Tin tur indikashon ku tin un oumento drástiko di pobresa. Míles di hende ku a pèrdè trabou. No mester balotá e preshon sikológiko ku tin su víktimanan sin ku nesesariamente ta detektá esakinan mes ora.
E desishon pa de-eskalashon di e medidanan a trese perspektiva, asina poko poko nos suidadanonan por kuminsá bai na ehersé nan trabou i gana nan pan di kada dia te asina leu ku esaki ta posibel.
Awor Gobièrnu mes ta tuma e riesgo dor di importá hende for di e episentro di malesa COVID-19, esta Merka.
Esaki ta un sla den karentena di e komunidat aki.
Mirando e ariba menshoná, frakshon di Movementu Progresivo, M.P, ta hasi e siguiente preguntanan na bo persona
Preguntanan
- E grupo di 85 personal médiko, ku a kaba di yega, lo bai den karentena pa 14. Kiko ta e balor agregá di e grupo pa duna asistensia médiko solamente pa 31 dia?
- E ekspertonan di nos isla a hasi un tremendo trabou den kontené e malesa COVID-19. Kiko ta e konsekuensia di e kaso ku a tèst positivo aki pa ku e durashon di e‘lockdown’ di nos komunidat?
- Minister S.Camelia-Römer ku a bai risibí e grupo aki ayera na nos aeropuerto tambe lo bai den karentena?
- E empleadonan di e diferente servisionan durante di na trabou, dunando servisio na e grupo aki, tambe ta bou di investigashon?
- Kuantu di e trahadónan aki a pone den karentena?
- Minister ta reevaluá e balor agregá di e grupo aki pa loke ta nan aporte den e krísis di COVID-19 aki pa Kòrsou? Esaki despues di tur esfuerso i sakrifisio ku henter e komunidat aki a hasi pa kontené e malesa aki?Lográ
- Mirando e echo ku tin 1 di e grupo di personal médiko ta positivo i no por ekskluí ku lo tin mas, esaki no ta motibu pa laga e grupo aki regresá nan pais bèk?
Atentamente,
Marilyn Moses
Frakshon di Movementu Progresivo
Na Presidente di Parlamento
- Millerson
Wilhelminaplein 4
Presente
Willemstad, 24 aprel 2020
Tópiko: Preguntanan pa Minister di Asuntunan General i Promé Minister
Apresiabel señor Presidente,
Pa medio di e karta aki, hasiendo uso di artíkulo 96 di Reglamentu di Òrdu di Parlamento di Kòrsou, mi ke hasi e petishon na bo persona pa dirigié e karta athunto na Minister di Asuntunan General, sr. Eugene Rhuggenaath.
Atentamente,
Marilyn Moses
Frakshon di Movementu Progresivo
