Regresá bèk Boneiru for di otro islanan awor posibel

Na Kòrsou, Saba i Sint Eustatius transmishon di e vírùs di corona a keda limitá te ku awor. E riesgo di importashon di e vírùs for di e islanan akí p’esei ta hopi chikitu. Pa e motibu akí regreso di personanan ku ta pegá riba un di e kuater islanan i ku ke bai nan isla bèk ta responsabel.

Na Kòrsou (16 kaso konfirmá) tambe e transmishon a keda limitá te ku awor. Desde 17 di aprel ningun infekshon a tuma lugá. Na Sint Eustatius infekshon a keda limitá na 2 kaso importá ku no a kondusí na mas transmishon. Na Saba tabatin dos kaso konfirmá di orígen deskonosí, pero for di e tempu ei no a raportá ningun infekshon mas. Na Saba ainda tin medidanan riguroso na vigor.

Ounke e riesgo di importashon di e vírùs for di tres islanan ta chikitu, ta pidi e personanan ku regresá Boneiru, pa tòg di forma inmediato bai den karentena. Pa asina ekskluí riesgonan. E karentena por tuma lugá den e propio ambiente di kas.

A pone algun kondishon pa karentena na kas. E siudadano ta firma un deklarashon di karentena i ta duna e adrès unda e lo keda dos siman. Sali pafó di kas, si no ta den propio hardin òf pòrch, no ta permití. Otro kompañeronan di kas por keda den e mes kas solamente si ta posibel pa hasi un partishon eksplísitamente entre esun ku ta den karentena na kas i e otro kompañeronan di kas. Sekshon di Salubridat Públiko ta embolbí ku evaluashon di esaki.

Un otro kondishon ta ku kompra mester ser hasí dor di un persona den e ret sosial. Si esun ku ta den karentena tin mester di kuido di famia i konosí, e ora ei e persona ku ta duna e kuido akí tambe ta bai den karentena. Pa e persona ku ta duna kuido di famia i konosí e mesun kondishonnan ta na vigor i tambe e instrukshonnan di higiena personal i doméstiko.

Pa Hulanda, Merka i e otro paisnan, e portanan di Boneiru ta keda será. Esaki ta keda nesesario pa motibu di e plamamentu amplio di e vírùs den e paisnan

akí i e riesgo di transmishon real ku esaki ta trese kuné na Boneiru. Pa bonerianonan ku ta na Hulanda i otro pais i ku ke regresá, ta tuma medidanan. Esaki ta e kaso tambe pa siudadanonan ku profeshonnan krítiko. Karentena na un sitio sentral e ora ei ta e úniko método seif pa laga personanan for di Hulanda i di otro pais drenta atrobe.