A kuminsá trese residentenan sistemátikamente bèk for di Hulanda

Medio aprel a organisá e promé vuelo di repatriashon for di Hulanda pa trese personanan ku un funshon vital bèk i pa nan por yuda den kombatimentu di e krísis di corona. Awor ku tur e personanan akí a sali for di karentena, e grupo di trabou di repatriashon (‘taskforce repatriëring’) ta hasi esfuerso pa konsekuentemente buska residentenan boneriano bèk ku a keda pegá na Hulanda i tambe personanan ku ke regresá via Hulanda.

A disidí, tanten ku esaki ta posibel, pa laga un kantidat di hende for di Hulanda regresá di forma kontrolá. Asina tin un fluho kontinuo di repatriante pa e isla. Nan ta bula ku un buelo semanal di KLM pa Kòrsou. Aya, ku pèrmit di outoridatnan di Kòrsou i Gezaghèber di Boneiru, nan lo kambia ‘wing-to-wing’ pa un vuelo di charter pa Boneiru. Esaki ta nifiká ku e personanan lo no drenta Kòrsou, pero lo kambia di avion riba e plataforma mes.

Dor di laga personanan for di Hulanda regresá di forma sistemátikamente i kontrolá, no ta pone un sobrepeso riba kuido médiko lokal i riba e kapasidat di akohida. E ta duna un posibilidat pa repatriashon pa tur residente boneriano ku ta pegá na Hulanda. Na mes momentu e posibilidat ta keda eksistí pa laga residentenan di otro lugá regresá adekuadamente, riba un base ‘ad-hoc’.

E sekuensia ku ta repatriá residentenan for di Hulanda, ta bai a base di kriterionan ophetivo. Un di e kriterionan akí ta ku e personanan mester tin un pasashi di regreso kaba pa Boneiru i e fecha te ki dia e pasashi lo tabata bálido ainda. E grupo di trabou ta hasi esfuerso pa di e forma akí laga mayoria residente ta bèk na kas na Boneiru pa fin di yüni. Siguimentu di e proseso akí ta dependé sinembargo kompletamente di kon e situashon ta desaroyá su mes mundialmente.