BAN PRAKTIKA MAS PASENSHI PA FARANDULA POR REBIBA!

BAN PRAKTIKA MAS PASENSHI PA FARANDULA POR REBIBA!

 

WILLEMSTAD — Na promé lugá direktiva di AMAK k’e duna un palabra di rekonosementu i felisitashon na artistanan ku durante dianan difísil di Covid-19 a sa pèrkurá pa alegria den hopi kas di famia, dunando presentashonnan ku a pasa na nos plantanan lokal di televishon. Ta bon pa nos menshoná aki tambe ku e plantanan di televishon tambe a duna nan aporte pa realisá e diferente proyektonan aki.

 

Awor ku Gobièrnu di Kòrsou a suavisá e medidanan tumá den kuadro di Covid-19, direktiva di AMAK ta hasi un apelashon riba tur artista, pero espesialmente riba fanátikonan, pa ban demostrá ku nos por karga responsabilidat. Nos mester keda atendé nos mes na reglanan di distansia sosial i  otro reglanan di Higiena, pa nos por keda mantené e efektonan negativo di Covid-19 abou.

 

Direktiva di AMAK ta lamentá ku den wikènt pasá, no ta tur hende a mantené nan mes na e protokòl ku ainda ta bálido den e período di krísis aki. Hustamente, ta  awor aki ta e momentu ku nos mester praktiká un komportashon korekto, pa asina ei duna outoridatnan e konfiansa ku por sigui de-estaklá e medidanan vigente.

Pa loke ta trata farándula, Direktiva di AMAK ta risibiendo informashonnan di vários grupo di interes, ku tin proposishonnan kon lo por bai enfrentá e futuro di nos farándula.

 

Direktiva di AMAK lo reuní ku un komishon ku ta konsistí di músikonan, pero tambe representantenan di promotornan, pa analisá sugerensianan ku a drenta i trata di yega na un dokumento ku próksimamente lo keda entregá na Gobièrnu di Kòrsou.

 

E pensamentu sigur ta bai  den direkshon pa ban wak kon por laga e toke de keda kuminsá un poko mas lat, pa asina ei duna e espasio di tempu pa por tene algun aktividat konforme kriterionan stipulá pa Gobièrnu. Pero pa nos yega asina leu, nos mester demostrá ku den e situashon aktual, nos ta respetá e medidanan ku ainda ta vigente i konsekuentemente trata di mantené e sifranan di Covid-19 abou.

 

Direktiva di AMAK ta gradesí tur esnan ku a manda nan reakshonnan pa enfrenta situashon aktual na un forma mas responsabel posibel. Tan pronto ku Direktiva di AMAK keda kla ku un posishon fiho den e asuntu aki, lo duna publisidat na esaki.

 

Direktiva di AMAK

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: