Prome Minister Evelyn Wever-Croes: Normal nobo ta permiti pa scolnan habri CONTAGIO ENTRE MUCHANAN TA HOPI CHIKITO

Prome Minister Evelyn Wever-Croes:

Normal nobo ta permiti pa scolnan habri
CONTAGIO ENTRE MUCHANAN TA HOPI CHIKITO

Aruba a drenta un otro fase cu un aire di positivismo. Nos ta den e prome nivel di e etapa nobo y poco poco nos ta drenta den e normal nobo. Siman pasa Prome Minister Evelyn Wever-Croes a presenta e cuadro di e 4 nivelnan cu ta wordo implementa y lo evalua cada nivel cu habri pa dos siman y si e desaroyo ta bon, ta bay pa e siguiente nivel. Esaki ta e caso tambe pa habrimento di scolnan cu ta parti tambe di flexibilisacion di medidanan.

Na Aruba por a nota cu masha poco mucha bou di 15 aña a wordo contagia cu e virus di Covid-19. Na Aruba nos tin 101 caso di contagio di Covid-19. Di 0-4 aña nos tin 0 caso. Di 5-9 aña nos a conoce 2 caso di cual niun di dos a wordo hospitalisa. Di 10-14 nos a conoce 5 caso cu tampoco niun a wordo hospitalisa. Di 101 caso, solamente tawata tin 7 caso entre edad 5-14 aña. (grafico 1) E percentahe di muchanan cu ta wordo infecta cu e virus na Aruba ta chikito, 4 % di e total compara cu adultonan cu ta 96%. (grafico 2)

 

Datanan recien di WHO tambe ta confirma cu rond mundo muchanan no ta wordo infecta mucho lihe cu Covid-19 y tampoco ta haya complicacionnan grave. (grafico 3)

 

Den su presentacion di dialuna anochi, dr. van Trigt di HAVA a indica cu e cifranan aki ta positivo y ta mustra cu muchanan no ta wordo contagia hopi lihe cu e virus di Covid.

Tur mucha cu ta registra na Aruba cu Covid-19 a haya esaki di adultonan den nan cas. Ta sigur tambe cu e muchanan mes no a transmiti esaki na adulto ni na otro muchanan. Esaki ta confirma cu e riesgo di contagio entre muchanan ta hopi chikito.

Mirando cu nos tin e contagio na Aruba bou control y cu e virus no ta plamando hopi mas, ta yega e momento tambe pa na Aruba nos cuminsa habri scolnan. Claro nos mester tene medidanan di precaucion y proteha esnan mas vulnerabel tanto maestronan y como studiantenan. 

Tur scol mester aplica e instrucionnan y reglanan entre otro reglanan di higiena: laba man, – structura di klasnan: bankinan etc, – limpiesa: mas regular. 

 

“Esakinan ta e instrumentonan principal pa scolnan habri na Aruba. Pakiko? Pasobra nos no kier pa niun mucha ni niun studiante sali perhudica. Esey te metanan cu nos tin y ta tumando tur medida di precaucion pa momento cu e ta safe y protocolnan ta in place, pa nos por habri scolnan bek. Ohala cu pronto por yega na un fecha pa habri scol”, Prome Minister a duna di conoce.