UOVV ta pidi komprenshon di komunidat

UOVV ta pidi komprenshon di komunidat

Geplaatst op 18 May 2020 dor di Ministerio Tráfiko, Transporte i Planifikashon Urbano

WILLEMSTAD – Servisio pa Tráfiko i Transporte (UOVV) ta pidi komunidat komprenshon den kuadro di atendementu di petishonnan ku ta entregá na e servisio. Lo trata esakinan denter di 1 siman di tempu. Normalmente esaki ta sosodé mesora, pero mirando e ‘nòrmal nobo’, esaki no ta posibel debí ku tin un prosedura nobo. Ta trata aki di petishonnan manera traspaso di un doño pa otro, registrashon di vehíkulo, duplikado di karchi di kùr, petishon pa eksonerashon, etc.

Den e último dianan e servisio a risibí mas ku 400 petishon i esakinan ta drenta mas lihé ku por prosesá nan. A konsekuensia di e ‘lockdown’, tin tambe un retraso grandi i ta trahando riba esakinan. Ta pidi tur kliente pa kontrolá su petishon promé ku e manda esaki via e-mail pa e servisio. Di e forma aki ta evitá ku mester tuma kontakto ku e kliente mirando ku falta informashon pa por prosesá e petishon.

UOVV ta sigui hasi un apelashon tambe na tur hende pa traha nan sita pa kùr outo i akudí na ‘Keuringslokaal’ segun bo sita. Esta no akudí na e departamentu sin sita i no bini oranan promé ku bo sita. Akudí 15 minüt promé ku bo sita ya asina tur hende por yega na bùrt na tempu, ku ta pone ku e sistema ta kana asina mas struktural tambe. Ta bon pa tur hende mantené nan mes na e regla aki i asina evitá disgustu.

UOVV ta trahando pa mehorá e servisio i bai na un sistema mas optimal digital, pero ta pidi  komprenshon den kuminsamentu aki. Pa informashon general por manda e-mail na info.uovv@gobiernu.cw