Prome Minister Evelyn Wever-Croes: Toque de queda a wordo kita: GOBIERNO A TRASPASA E RESPONSABILIDAD BEK DEN MAN DI CADA CIUDADANO

Prome Minister Evelyn Wever-Croes:

Toque de queda a wordo kita:

GOBIERNO A TRASPASA E RESPONSABILIDAD BEK DEN MAN DI CADA CIUDADANO

Desde 13 di maart 2020, Gobierno di Aruba a tuma decisionnan cu a bay hopi leu pa loke ta trata e maneho di Crisis Covid-19. A tuma decisionnan pa cera e fronteranan di Aruba, e lockdown. A cera scolnan, a prohobi bishita na casnan di cuido y hospital, a bin cu ‘shelter in place’, ‘samenscholingsverbod’ y toque de queda. Tur esakinan tawata decisionnan cu ta bay hopi leu pero cu a tuma hopi trempan na comienso di entrada di Covid-19 na nos pais. Sin duda, Prome Minister Evelyn Wever-Croes a duna di conoce cu e desicionnan aki a yuda nos pa evita e plamamento di e virus. 

Diasabra 21 di maart 2020, Gobierno di Aruba a tuma e responsabilidad over y a limita e movecion di nos ciudadanonan pa asina proteha cada ciudadano y asina scapa bida di cada un. Dos luna despues, diahuebs 28 di mei 2020, Toque de queda a wordo elimina pa mei anochi. Cu esaki, e responsabilidad ta bek den man di cada ciudadano. Prome Minister ta haci un apelacion pa ta cauteloso y cada ken cuida su mes y su famia. 

“Poco poco mirando e resultadonan y exito cu e strategia aki a duna, nos a bin ta hala atras bek e medidanan un pa un. Diahuebs anochi pa 12:01 am a elimina toque de queda mirando cu e trayectoria y e casonan cu nos tin huridicamente, nos no por hustifica mas pa prolonga esaki. Ta hopi importante pa enfatisa, mirando e discusion cu tawata tin den pueblo riba e topico aki, cu no ta pornada Gobierno a bin cu toque de queda. E no tawata un idea descabeya pero un decision hopi grandi y dificil cu nos a tuma despues di hopi evaluacion cu e meta pa scapa bida di hende. Varios pais no a tuma e decisionnan aki mesora y esaki a cuasa bida di miles y miles di hende y esaki ta loke nos kier a evita”, Prome Minister a expresa.

Prome Minister a enfatisa, contestando varios pregunta cu e ta ricibi tur dia, cu nos lo no bay na e normal bek. E normal cu nos conoce no ta bin bek nunca mas. Nos ta drentando den normal nobo cu reglanan nobo. 

“E virus aki a causa hopi dolor y hopi sufrimento den henter mundo. Nos a mira e paisnan grandi caminda miles di persona a bira malo y a fayece. Nan a fayece nan so ya cu nan tawata den cuido intensivo cu mas hende malo y no tawata tin famia cu nan pa tene nan man den e ultimo momentonan. Hopi mester a wordo dera sin cu e famianan tawata por a bay y despedi di nan sernan keri. Tur e sufrimentonan aki nos a evita na Aruba cu e strategia cu nos tawata tin. Awo cu e toque de queda a stop, aworaki como Gobierno nos a tuma e decision di traspasa e responsabilidad bek den bo man, Prome Minister Evelyn Wever-Croes a expresa.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: