MINISTER PRESIDÈNT RUGGENAATH TA HABRI KURSO PA MAESTRONAN DOMINA DUNAMENTU DI LES ONLINE

MINISTER PRESIDÈNT RUGGENAATH TA HABRI KURSO PA MAESTRONAN DOMINA DUNAMENTU DI LES ONLINE

Willemstad- Willemstad 3 di yüni 2020- Minister Presidènt, kende ta Minister di Enseñansa tambe, Sr. Eugene Rhuggenaath resientemente a duna apertura na un kurso pa dosentenan di skol di fundeshi i skol sekundario por atkerí konosementu i dominá medionan básiko pa por duna lès online. E kurso ta ser organisá pa Institute for Professional Excellence i ta keda duna pa SimplicID.  140 dosente lo partisipá den e promé dos gruponan di dosentenan ku lo haña a formashon aki.  E kursonan lo keda duna online i lo tin un durashon di 6 siman. E maestronan a keda apuntá pa e direktivanan di skol ku tin skol di fundeshi i sekundario.

Debí na COVID-19 i e lockdown ku a siguí nos hóben i dosentenan a keda obligá di interaktivá atraves di un pantaya. Esaki a hasi nos konsiente ku no opstante e echo ku nos skolnan a habri atrobe, lèsnan lo keda duná na un forma diferente debí na e mantenementu di distansha sosial i e tempu ku e muchanan ta pasa den klas por keda redusí dramátikamente. Hopi di nos dosentenan, ainda, no tin e eksperensha i konosementu di dunamentu di lès online.  Esaki por influenshá e edukashon di e mucha. Ta pa e motibu aki IPE a bin ku un solushon ofresiendo e dosentenan medio i konosementu básiko pa krea métodonan efisiente i efektivo pa duna lès online.

Den su diskurso Minister Presidènt Rhuggenaath, na inisio di e  kurso, a suprayá e importansha di desaroyo di e potensial di nos muchanan. E mandatario a bisa ku  COVID-19 a pone nos dal un salto pa dilanti i ekipá nos maestronan ku e kapasidat i instrumènt pa por perkurá ku nos muchanan por siguí nan enseñansa ku medionan al dia.  Gobièrnu a brasa e inisiativa aki di IPE i ta kontentu ku esaki ta tuma lugá den estrecho koperashon ku e direktivanan di skol. Minister Presidènt Ruggenaath a suprayá su konfiansa ku nos mes hendenan, esta den e kaso aki e maestronan ku ta partisipá na e kurso, lo kontribuí na krea nos pais komo modelo di “best practice.”   

IPE ta inisiativa di Bureau Telecommunicatie en Post, Aqualectra, SOAB, i CHATA tambe ku entre tantu a uni nan mes na IPE. IPE ta un paso lógiko ku a surgi for di un di e pilánan importante di e esfuerso mayó pa desaroyá Kòrsou den un “SmartNation”. IPE su funshon ta pa realisá programanan dirigí riba re-ekipá profeshonalnan di entidatnan ku ta partisipá, i demas suministradó di servisio i tambe otro profeshonalnan den nos komunidat pa djòpnan di futuro. Ta hasi bon uso di e sinergia pa asina un grupo mas grandi den nos komunidat por probechá i prepará nan mes pa tin bienestar atraves di e djòpnan nobo ku ta presentando nan mes. IPE ta ofresé programanan di rekapasitashon i optimalisashon di konosementu riba tur nivel pa optimalisá abilidatnan spesífiko importante pa prepará e profeshonal pa e djòp di futuro.

Pa mas informashon por manda un e-mail na info@ipe.cw.

 

This site uses Akismet to reduce spam. Learn how your comment data is processed.

%d bloggers like this: