Minister Steven Martina ta felistá tur nos koperativanan na Kòrsou riba dia internashonal di koperativa.

Minister Steven Martina ta felistá tur nos koperativanan na Kòrsou riba dia internashonal di koperativa.

Tur aña riba e promé djasabra di yüli, International Cooperative Alliance (ICA) ta selebrá dia Internashonal di Kooperativa. I kada aña ICA ta skohe un tema pa e okashon. E aña aki e tema i enfoke ta riba e kontribushon di kooperativanan pa kombatí kambio di klima ku tin komo meta pa trese konsientisashon.

E tema pa 2020  ta ”Cooperatives for Climate Action”

“Kooperativanan pa Akshon pa Klima”

Minister Martina  kier felisitá tur kooperativanan di Kòrsou ku nan dia spesial.

 E aña aki kontrali na e añanan anterior pa motibu di ousteridat no tin un aktividat kaminda MEO ta invitá kooperativanan pa asina huntu duna rekonosementu na e fecha i na kooperativanan.

For di 2018 MEO ta miembro di ICA i komo tal Kòrsou ta tuma e petishon di e presidente di ICA, sr. Ariel Guarco na serio. Su petishon na tur miembronan ta pa hasi un esfuerso, pa den forma di akshon i konsientisashon duna di nos parti pa drai bèk e efektonan di Kambio di Klima.

Mi kier hasi uzo di e oportunidat aki pa uni mi mes na sr. Ariel Guarco i pidi nos kooperativanan na Kòrsou pa nan tuma nota di e tema e aña aki esta “Kooperativanan pa Akshon pa Klima” i pa kada kooperativa analisá kon nan por kontribuí na e akshon aki i tambe kon nan por konsientisá nan sosionan pa nan tambe duna nan kontribushon pa huntu nos logra e meta. 

Komo Minister di Desaroyo Ekonómiko mi ta kontentu di por informá ku mi ministerio tin algun aña ta kana den e direkshon di e tema di 2020 aki. Na Febrüari 2018 nos a introdusí pa promé bia un Maneho di Energia Nashonal pa Kòrsou. Den e maneho aki e mishon ta pa na 2035 por lo ménos 50% di e energia ta renobabel i sostenibel i tambe pa baha e konsumo di energia ku 25% dor di praktiká efisiensia. Mas uzo di pènel solar,energia di bientu, gas natural, un sistema di transporte mas efisiente, hasi kasnan i edifisionan mas efisiente pa ku uzo di energia ta entre algun di e strategianan den e maneho energétiko via di kua Kòrsou ta bai duna su kontribushon na e tema i na e petishon di Presidente di ICA, sr. Ariel Guarco.

Mi ta deseá tur Kooperativanan, tur Federashonnan di Kooperativa i sosionan Kooperativista na Kòrsou, UN FELIS DIA DI KOOPERATIVA. Ban demostrá ku pa medio di e filosofia di Kooperativa awor mas ku nunka nos lo por trese hopi solushon i benefisio pa desaroyo sosial ekonómiko di Kòrsou!