Área deportivo pa Juan Domingo ta bira un realidat!

Área deportivo pa Juan Domingo ta bira un realidat!

 

Willemstad – Bario di Juan Domingo pronto lo por konta ku un bunita área deportivo. Gobièrnu di Kòrsou huntu ku Kooyman i Unidat di Bario ta traha huntu pa desaroyá esaki, i a duna inisio awe 7 di yüli 2020. 

 

Último añanan e área di Jan Noorduynweg a mira diferente desaroyo positivo, manera entre otro konstrukshon di Kooyman Megastore, un rotònde na altura di Cost-U-Less, i a duna La Curaçao un tereno komo opshon pa nan edifisio nobo. Awor ta sigui ku e plan aki kaminda ta enfoká tambe riba e aspekto sosial  i deportivo di bario. 

 

Juan Domingo ta konosí pa su baluartenan den deporte, i tur aktor a mira e importansia pa duna rekonosementu i sigui stimulá esaki tambe. Pa e motibu aki, e área deportivo lo konsistí di un vèlt di futbòl, i un kancha multi- funshonal pa entre otro basketbòl i vòlibòl. Djamars  7 di yüli a duna inisio na trabounan ku lo terminá pa desèmber 2020. E trabounan lo ta na enkargo di kontratista CWM. 

 

Tambe den futuro lo konstruí e sentro di bario kaminda bario por bini huntu pa diferente aktividat. 

 

Durante di e seremonia minister di Trafiko, Transporte i Planifikashon Urbano sra. Zita Jesus-Leito a trese dilanti ku e ta atmira e espiritu di e bario ku na opstante preparashon di e proyekto a stanka un tiki, nan a sigui ku mes un konvikshon pa e proyekto.