Ombudsman di bishita serka Presidente di Parlamento

Ombudsman di bishita serka Presidente di Parlamento

Awe mainta Defensor di Pueblo (Ombudsman) di Kòrsou, sr. Keursly Concincion a realisá un visita di será konosí serka Presidente di Parlamento, sra. Ana Maria Pauletta. Durante e reunion aki sr. Concincion a asentuá puntonan di importansia pa ku e instituto Defensor di Pueblo di Kòrsou.

 

Den e tempu krítiko aki ta sumamente importante pa Organonan di Estado, manera Defensor di Pueblo, ta serka di prosesonan demokrátiko. Defensor di Pueblo ta e úniko kolegio ku ta keda skohé direktamente dor di Parlamento i esei ta enfatisá e importansia ku e trabounan di e instituto aki mester tin pa Parlamento kual ta e organó skohé pa representá pueblo.

Parti di trabounan di Defensor di Pueblo ta pa raportá situashonnan di entre otro falta di bon gobernashon. Den e kuadro aki Presidente di Parlamento a palabrá konkretamente ku e lo drenta den kontakto ku e ministernan responsabel pa algun puntonan di atenshon urgente pa mira kon por yuda alivia dolónan agudo di pueblo ku ta yega na oído di Defensor di Pueblo i ku a keda raportá.

Tambe lo trata pa mas pronto posibel den Parlamento e konsepto di lei ku ta regla oumento di efektividat di entre otro e protekshon ku Defensor di Pueblo lo mester duna.