Selikor ta eliminando retraso den skema di shushi di kas

 

Selikor ta eliminando retraso den skema di shushi di kas

 

Ta un hecho ku pa algun siman kaba e servisio di Selikor pa loke ta trata rekohementu shushi di kas a konfrontá retraso. E motibu ta ampliamente konosí: orígen di wèlga i ménos kapasidat di trùknan pa duna e servisio konserní.

Pa loke ta trata e siman akí, te ku awe, Selikor a rekohé un gran parti e rutanan. Pa e fin di siman akí, durante djasabra i djadumingu lo sigui traha den entre otro e ruta di djaluna, ku eksepshon di Banda Bou. Den wikènt tambe lo sigui rekohé barionan di e ruta di djamars. Tambe lo trata na eliminá e retraso den barionan di e rutanan ku a keda atras. Lo pasa rekohé tambe shushi na playanan.

Komo kompania responsabel pa maneho di limpiesa, Selikor ta keda hasi su máksimo esfuerso pa kumpli ku e tareanan i normalisá e rekohementu di shushi mas lihé ku ta posibel. Nos enfoke ta pa inisiá un siman nobo ku e skema normal i rekohé shushi segun e skema kustumbrá.

Nos ta konsiente ku e situashon aktual ta inkómodo pa kada habitante ku sigur ta eksperensiá ekseso di shushi dilanti di nan kas. Selikor un biaha mas ta pidi diskulpa pa kualke inkonbeniensia ku e retraso akí por a trese kuné. Gerensia di Selikor ta duna un garantia ku nos personal, sigur esnan operashonal, ta trahando duru hasiendo lo máksimo pa yuda normalisá e situashon.