JEDIEL LAURANT: E PROMÉ GANADÓ DI FIFA20 AKI NA KÒRSOU
JEDIEL LAURANT: E PROMÉ GANADÓ DI FIFA20 AKI NA KÒRSOU
WILLEMSTAD – Djadumingu último a tuma lugá e final di e promé kompetensha di ‘eSports’ aki na Kòrsou. Den un ambiente ameno na Madero, un multitut di hende a presensiá e bataya entre e dos finalistanan den e kampionato di FIFA20, e wega di futbòl mas popular den e mundu di ‘eSports’. E hóben Jediel Laurant a resultá e ganadó absoluto ku e tim Manchester City i un skor di 3-1.
Kòrsou a biba ku e final di FIFA20!
Den un ‘setup’ i show espektakular, un públiko miksto ku hende di diferente edat a presensiá e final di e kompetensha di FIFA20. DJ Jay Stax a pone ambiente for di tempran huntu ku animashon di Dayenne Lauffer. Tambe tabata tin diferente aria speshal ku entretenimentu (gamezone), kaminda presentenan por a hunga weganan di FIFA20 riba pantayanan gigantesko i risibí premionan manera kèts di Changes, ‘gadgets’ di L’Amiga i hopi mas.
Premionan atraktivo
E hóben ganadó Jediel Laurant a gana 350 Florin kèsh i un stul ergonómiko speshal pa profeshonalnan den e mundu di ‘eSports’. Entrega di premio lo tuma lugá djárason 8 di yüli na Changes Saliña pa 3’or di atardi.
Danki pa un kampionato eksitoso
Na Kòrsou meskos ku rònt mundu, ‘eSports’ ta disfrutá di un akohida enorme bou di hendenan di tur edat. Weganan manera FIFA20, Fortnite i League of Legends ta hopi popular i ta wòrdu hungá tur dia riba plataforma lokal pero tambe internashonal. Durante e simannan promé ku e evento final, Kòrsou a biba ku e kampionato aki masha hopi mes. Curaçao Gaming League ta gradisí hinter e pueblo di Kòrsou pa a sostené e kampionato aki i ta komprometé su mes pa ku mas kompetensha den 2020. Un danki speshal na tur e partnernan di Curaçao Gaming League ku a hasi esaki posibel: L’Amiga, Mauricia Pictures, Changes, Distribier, Madero, Dolfijn FM, 88Rockorsou i Help’R.
Mas informashon?
Keda na altura di tur lokual ta trata ‘eSports’ aki na Kòrsou dor di bishitá Curaçao Gaming League su página di Facebook.
