INSTALASHON DIREKTIVA NOBO DI TOASTMASTERS CLUB BADEN POWELL
INSTALASHON DIREKTIVA NOBO DI TOASTMASTERS CLUB BADEN POWELL
WILLEMSTAD – Djasabra anochi, 11 di Yüli 2020, Toastmasters Club Baden-Powell a instalá kuater miembro nobo i su direktiva nobo pa aña 2020-2021.
E maestro di seremonia pa e anochi di instalashon tabata Toastmaster (TM) Sra. Nerissa de Haak-Sanches, ku a hasi un tremendo trabou pa dirigí e anochi bunita aki.
Despues di e parti protokolar di e apertura, Presidente saliente TM Sr. Rannick Paula a instalá e kuater miembronan nobo, siguí pa su diskurso di despedida komo presidente. E presidente saliente den su diskurso a duna un rekuento di e loke nan a pasa durante su aña. Tambe el a gradisí tur miembro di direktiva saliente i duna kada unu un muestra di apresio.
Ta bon pa remarká ku den e aña 2019-2020 ku trabou duru di kada miembro i e direktiva, komo un ekipo, klup a logra optené e máksimo distinshon kual ta “PRESIDENT DISTINGUISHED CLUB” nifikando ku klup a kumpli ku tur e eksigensianan ku Toastmasters International ta pone komo meta pa un aña.
E direktiva nobo a keda instalá pa Direktor di área saliente Sra. Feedra Pichardo-Rosheuvel.
Direktiva nobo di Toastmasters Club Baden-Powell di aña 2020-2021 ta konsistí di:
- Presidente – TM Farrahnedy Nicastia
- Vise-Presidente di Edukashon – TM Zoraida Pisas
- Vise-Presidente Miembresia – TM Laurella Martis
- Vise-Presidente Relashon Públiko – TM Miloushka Rosario
- Sekretario – TM Regis Mercera
- Tesorero – TM Arjan Yntema
- Sargento di Arma – TM Ludson Valks
- Eks presidente inmediato – TM Rannick Paula
Miembronan nobo ku a keda instalá ta:
- TM Rudsel Albertoe
- TM Numida Mercelina
- TM Miloushka Rosario
- TM Jennifer Hypolite
Presidente nobo – Sra. Farrahnedy Nicastia den su diskurso di aseptashon, a sigurá e presentenan ku e direktiva ku e ta presidí lo bai traha hopi duru formando un ekipo sólido ku tur miembro di e klup di Toastmaster p’asina tur miembro por krese huntu trahando riba kresementu individual i di e ekipo. E tema ku e direktiva nobo a skohé pa e aña 2020-2021, ta: “Ban Sigui krese huntu”.
Durante e anochi aki presentenan a keda honrá ku un diskurso kòrtiku tresé dor di TM Darcy Lopez, pa yama e direktiva nobo bonbiní den kua el a elaborá riba e importansha di sigui krese i no keda pará un kaminda. Tambe tabata presente nos Direktor nobo di Área kual ta TM Darrellyn Alberto di University of Curacao Toastmaster Club.
E aña aki Baden Powell Toastmaster Club ta forma parti di Área 5 huntu ku University of Curacao, The Achievers i Ars Oratoria Advanced Toastmasters club.
Toastmasters ta un organisashon “no lukrativo” ku ta trein su miembronan pa por dirigí palabra den públiko i tambe siña liderato i hopi otro abilidatnan ku ta útil, pa e trabou i organisashonnan ku e miembronan ta forma parti di dje.
Direktiva nobo di Baden Powell Toastmaster Club ta antisipá, un aña eksitoso, dinámiko i yena ku hopi bendishon pa tur e miembronan di e klup, asina ku e aña aki e klup logra tur su metanan pa por keda mantené e título di President’s Distinguished Club.
Si bo ta interesá pa ekipá bo mes ku abilidatnan di por papia den públiko, liderato i komunikashon en general bo por tuma kontakto ku nos Vise Presidente di Miembresia – Sra. Laurella Martis na telefon – 528-0557 òf email na toastmasterclubbadenpowell@gmail.com. Tambe por like nos facebook page BPTMC.