Bena Mayó ta lansa su cover di Madjango

 

Bena Mayó ta lansa su cover di Madjango

Willemstad – Awe 9 di mart 2021 e agrupashon musikal Bena Mayó a lansa riba plataformanan di media sosial su cover di e seú tan stimá Madjango. Ku e produkshon i e videoklep akí, Bena Mayó ta transmití su amor pa seú, i kompartí su vishon pa ku modernisahson di nos músika kultural. Bena Mayó ta kere firmemente ku nos músika kultural ta un ardu prinsipal di nos kultura i identidat komo Yu di Kòrsou.

 

Madjango

Madjango ta un seú originalmente kompositá pa Carlos Zimmerman i interpretá pa Richelyne Zimmerman den e festival di Kantadó Mayó na aña 2008. Madjango a bira rápidamente un di e seúnan mas gusta den nos komunidat. Ku e eskoho di Madjango, Bena Mayó ke konopá kabuya bieu na kabuya nobo. Nos por konsiderá e cover di Madjango komo un transformashon moderno di e seú orginal. Nos a introdusí diferente elemento nobo, i instrumento musikal pa trese un toke inovativo na e seú. Nos a introdusí entre otro: batá, keyboard, zonido elektróniko, ku normalmente no sa usa den seú tradishonal. E videoclip tambe ta ilustrá modernisashon i inovashon, por mira por ehèmpel plantamentu den un hardin den siudat, esaki ta un ‘urban garden’. Ku esaki Bena Mayó ke duna honor i rehalse na nos seú i present’é den un skalchi di oro.

 

Bena Mayo

Bena Mayó a nase na aña 2020 i ta originá for di e agrupashon rítmiko Hóbenennan Positivo i Akitvo (HPA). Despues di a partisipá i kontribuí 14 aña largu na Kantadó Mayó, alkansando e título máksimo na seis okashon, nos a skohe na aña 2019 pa sera e kapítulo di HPA i duna apertura na un fase nobo. Bena Mayó su meta prinsipal ta pa hasi nos músika kultural  ‘transgenerashonal i internashonal’ pero manteniendo e base i rikesa étniko kultural. Bena Mayó ta kere ku seú i otro ritmonan kultural ta pa tur hende, tur generashon i tur nashonalidat. Nan ta produkto di nos kultura ku ta bon pa eksportá. Ku e metanan akí na mente, Bena Mayó ta produsí músika kultural den un bachi moderno. Ku nos músika nos ta meskla elemento musikal i pashon humano huntu pa asina konopá pasado, presente i futuro huntu den arte ku ta aksesibel pa mundu.

 

Huntu nos por logra mas

E produkshon i videoklep di e cover di Madjango ta un resultado di trabou den tim. E produkshon musikal tabata na enkargo di e músikonan di Bena Mayó liderá i dirigí pa direktor musikal i produktor di Bena Mayó; Elbert Jozefa, el a ser asistí den esaki pa entre otro Marvin Snijders i Jerrel Paula pa e “mix & mastering”. E kantante prinsipal di e cover ta Ellie Laker ku ta e integrante mas resien di Bena Mayó. E músika i koro tabata na enkargo di e tim di Bena Mayó.

 

E produkshon di e videoklep tabata na enkargo di Maurica Pictures ku tambe a kere den e vishon di Bena Mayó i a duna su aporte inkondishonalmente. FAK Curacao a sòru pa e tremendo baile i e ‘script’ i koordinashon tabata na enkargo di Cindy Jozefa do Rego.

 

Finalmente Bena Mayó ta yama danki na Mari Koeiman, Clayvan Pietersz, Junior Tecla i Kunuku Bena Mayó i Fundashon Ser’i Otrobanda pa nan sosten i aporte.

 

Kiko ta sigui?

Bena Mayó tin diferente produkshon den tapara. Konektá ku nos via di Facebook i Instagram pa asina keda bon na altura.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: