Protokòl pa Staten stòp di reuní pa medio di e sistema virtual i reunion públiko relashoná ku refineria Isla, búskeda di un partner i maneho energétiko di gabinete Rhuggenaath

 

Willemstad, 20 di yüli 2020

 

Na Presidente di Parlamento

Señora A. Pauletta

p/a Wilhelminaplein # 4

PRESENTE

 

Tópiko: Protokòl pa Staten stòp di reuní pa medio di e sistema virtual i reunion públiko relashoná ku refineria Isla, búskeda di un partner i maneho energétiko di gabinete Rhuggenaath 

 

Apresiabel señora Pauletta,

 

Frakshon di MFK pa medio di e karta aki, ta aserka bo persona ku e siguiente dos petishonnan;

 

1. Manera ya indiká na bo persona na vários okashon, gobiernu di Kòrsou a eliminá mayoria di e desishonnan relashoná ku “lockdown” i tambe “Shelter in Home”, skolnan a habri bek i nos ta konstatá ku tur ofisina di gobiernu ta funshoná normal bek.

 

Den kaso di Parlamento, tur frakshon den Parlamento a koperá pa adaptá Reglamento di Orden pa por tene reunionnan virtual. Pero mirando ku na Kòrsou ya pa mas ku dos luna e Pandemia ta bou di kontrol, nos ta lamentá ku ta hasi mal uso di e situashon ku a reina di COVID-19 pa keda mantené e reunionnan di forma virtual.

 

Frakshon di MFK ta spera ku manera bo a primintí den último reunion di Parlamento ku lo bo presentá e siman aki un protokòl pa aprobashon na Parlamento, pa asina Parlamento por funshoná bek ku su reunionnan den sala di Parlamento i no mas di forma virtual. Esaki debí ku na Kòrsou no tin un “Ernstige Verstoring van de Openbare Veiligheid”, manera artíkulo 120a insiso 1 di Reglamento di Orden ta indiká

 

1. Frakshon di MFK den su karta fecha 1 di yüni 2020 i ku number di registrashon di RIS SR 0416-1h V/18-19, a pidi un reunion públiko ku e siguiente punto di agènda;

 

“Situashon di empleadonan di refineria Isla, búskeda di un partner stratégiko pa refineria Isla i maneho energétiko di gabinete Rhuggenaath”

 

Mirando e desaroyonan ku tin relashoná ku refineria i e frakaso di e dil ku e kompania Klesch. Frakshon di MFK kier pidi bo pa mas pronto posibel i si por e siman aki mes yama e reunion aki.

 

Parlamento i pueblo di Kòrsou mester haña klaridat, despues ku RdK a gasta alrededor di 31 mion florin pa buska un partner pa refineria, awor direktor di RdK ta deklará siman pasa ku ta bai kuminsá ku un trayekto nobo un biaha mas, pa buska un partner stratégiko pa refineria Isla.

 

Ta imperativo pa Parlamento sa kuantu e trayekto nobo aki lo bai kosta pueblo di Kòrsou i si ta ku mes un tim ku a frakasá lo bai kuminsá e trayekto nobo aki.

Na nòmber di frakshon di MFK

 

Gilmar Pisas

Lider di frakshon

pa MFK

Adhunto : Petishon pa reunion di Parlamento fecha 1 di yüni 2020