Kamber di studiante na Hulanda

Kamber di studiante na Hulanda

Geplaatst op 23 July 2020 dor di Ministerio Enseñansa, Siensia, Kultura & Deporte

Tur aña di nobo Stichting Studiefinanciering Curaçao (SSC) ta finansiá un grupo grandi di studiante ku ta bai studia na Hulanda. Pa aña eskolar 2020/2021 tin 192 studiante ta bai studia na Hulanda ku SSC. E buelo lo ta dia 26 di yüli próksimo ku KLM.

Un di e bentahanan ku e studiantenan ku ta bai studia ku SSC tin ta ku si nan pidi SSC pa kamber, nan ta haña un kamber pa e promé 11½ luna di nan estudio. Pa e siguiente aña nan mester ta inskribí na un instansia pa nan por bini na remarke pa un otro kamber, kaminda nan lo por keda te na final di nan estudio.

Pa loke ta trata esaki, SSC ta informá e studiantenan den diferente forma i na vários momento. Tur e informashonnan aki e studiante ta haña pa mira e importansia pa ta inskribí for di trempan i pa kuminsá buska un kamber na tempu. Esaki pa despues di e promé aña e studiante bai den su propio kamber pa asina duna studiantenan nobo ku ta bini e siguiente aña, e mesun oportunidat ku nan tambe a haña.

Aña pasá tabatin 204 studiante ku a bai studia Hulanda, di kual mayoria a haña kamber òf algu temporal pa nan bai aden. Apesar di tur e informashon ku SSC a duna e studiantenan, tòg e aña aki tabatin 2 studiante ku no kier a sali for di e studio ku nan tabata aden. 16 di yüli ta e dia ku según kòntrakt nan mester a sali for di e kamber. Tantu SSC komo DUWO (e instansia ku ta doño di e kambernan) a bisa e studiantenan ku 16 di yüli nan mester sali i ku nan NO por keda den e kamber. SSC ta konsiente ku e studiantenan ta preferá di keda den un studio kaminda nan no tin ku kompartí nada ku otro studiante, pero e tipo di kambernan ei no ta fásil pa haña ku solamente un aña di inskripshon (pa motibu ku e tipo di kamber nan ei tin un tempu di espera hopi largu). Pa e motibu aki ta konsehá studiantenan ku na momentu ku mester sali for di e kamber di SSC i nan no a logra haña un studio (manera nan tabata preferá), pa e ora ei tuma un kamber ku sí ta disponibel te ora nan haña un studio manera nan ta deseá.

Entretantu a palabrá ku e dos studiantenan ku SSC por yuda nan ku un kamber temporal te ora nan keda kla ku un otro kamber. SSC ta lamentá ku apesar di tur informashon i esfuerso ku ta hasi, ta krea e impreshon ku sin mas SSC a saka studiantenan for di nan kamber i laga nan riba kaya. SSC ta spera ku tur studiante mantené nan mes na palabrashonnan. Di e manera aki SSC por sigui garantisá su servisio na tur studiante.

 

 

 

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: