Maneho i implementashon di rekonstrukshon di Kòrsou mester keda asuntu di pais

Maneho i implementashon di rekonstrukshon di Kòrsou mester keda asuntu di pais

Geplaatst op 04 August 2020 dor di Ministerio Asuntunan General i Promé Minister

WILLEMSTAD – Den un karta dirigí na Parlamento di Kòrsou, komo reakshon riba e proposishon di Hulanda pa ku sosten di likides na Aruba, Kòrsou i St. Maarten, Gobièrnu di Kòrsou a indiká di no por bai kompletamente di akuerdo ku e forma ku Hulanda ta proponé esaki i kondishonnan mará na dje. Gobièrnu di Kòrsou ta konsiente di e nesesidat pa tuma pasonan firme ku ta rekerí sakrifisio grandi den kuadro di reforma i rekonstrukshon di pais. Sinembargo, esaki mester keda den un kuadro realístiko kaminda Kòrsou ta mantené responsabilidat pa su propio progreso, pero – a base di bon palabrashon – por konta riba sosten di Hulanda pa por realisá su metanan. Pa esaki, Gobièrnu di Kòrsou ta hasi un súpliká na Parlamento pa risibí e respaldo nesesario na momentu di sigui negoshá ku Hulanda.

E proposishon di Hulanda ta enserá un pakete koherente di proposishonnan ku ta konserní adaptashon di e lei di Reino, establesementu di un órgano di gobernashon independiente basá riba lei Hulandes pa loke ta restrukturashon i rekonstrukshon di pais, un plan di reforma struktural i tambe kondishonnan pa por risibí e di 3 parti di sosten finansiero. En general Gobièrnu di Kòrsou ta komprondé punto di salida di e proposishonnan aki, pero na e mesun momentu ke mustra Hulanda riba e inklaridat i vários pregunta hurídiko ku e proposishonnan aki ta trese kuné. Sigur pa loke ta trata e relashonnan statutario entre e paisnan den Reino, seguridat hurídiko i un balanse korekto entre outoridat i responsabilidat di e diferente partnernan envolví. Na momentu ku esakinan no ta kla definí, nos derechonan fundamental siendo un pais outónomo den Reino ankrá den nos Statüt por kore riesgo di eksistensia.

Echo ta ku Kòrsou, awor mas ku nunka pa motibu di e situashon sosial-ekonómiko agudo ku a surgi a konsekuensia di e pandemia di COVID-19, mester di ayudo finansiero i sosten tékniko di Hulanda pa por surpasá e periodo tan difísil aki ku e ta enfrentando. Gobièrnu di Kòrsou ya a kuminsá kana e kaminda di transformashon atraves di e Strategia di Kresementu ku el a bin ta implementá den e último 2 aña i e Programa di Rekuperashon i Reforma ku a start direktamente despues di e krísis di Corona Vírùs. Mirando ku e proposishonnan di Hulanda pa ku e plannan di reforma básikamente ta den mesun liña ku e strategia i plannan anteriormente menshoná, Gobièrnu di Kòrsou ta konfia ku pa medio di e konsultanan ku lo sigui den e simannan benidero, Hulanda i Kòrsou por yega na un akuerdo hustu i solidario durante e reunion di Konseho di Minister di Reino ku ta planiá pa 14 di ougùstùs benidero.

‘Download’ aki e karta di Gobièrnu di Kòrsou ku a bai pa Parlamento di Kòrsou.