KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNUNOTISIA

Demokrasia parlamentario ta tuma lugá den parlamento; Nò den media

 

Demokrasia parlamentario ta tuma lugá den parlamento; Nò den media

 

Un di e prinsipionan di Partido Inovashon Nashonal (PIN), komo un partido ku ta partisipá den un estado di derecho, ta netamente òrdu den e proseso demokrátiko. PIN a tuma nota ku asombro kon algun parlamentario kier pone tur lokual Areglo di Estado, Kiesreglement i Reglamentu di Ordu di Staten a fiha komo base pa funshonamentu di demokrasia parlamentario un banda violando asina e prinsipionan fundamental di nos demokrasia. Mientras Areglo di Estado ta fiha bon kla kon desishonnan di Parlamento mester tuma lugá, esta den diferente reunionnan reglamentá, algun parlamentario a skohe pa hiba e desishonnan ey den media.  

 

Segun Areglo di Estado, Parlamento ta un organo di estado ku ta representá henter pueblo (art. 39 AdE). Nos Areglo di Estado no konosé e divishon polítiko di partidonan di koalishon òf oposishon. E organo importante aki ta konsistí di 21 miembro segun art. 40 di Areglo di Estado. Lo ta insólito djis pensa ku un gobièrnu lo mester bati retirada of disolvé parlamento i yama elekshon nobo despues ku 1 of mas parlamentario pèrdè nan fakultat pa ehersé nan trabou, p.e. dor di malesa òf morto. Ningun hende ku ta pensa normal lo no por argumentá ku e gobièrnu a pèrdè su mayoria entre e momentu ku un of mas parlamentario stòp repentinamente di funshoná i su susesor keda huramentá.  

 

Nos parlamento tin un periodo di asiento di 4 aña (art. 41 AdE) i ta ser direktamente skohé pa medio di elekshon sekreto dor di esnan ku derecho di voto (art. 42-43 AdE). Staten- no un minoria òf mayoria- mester investigá e kredenshalnan di kada miembro skohé. Den e aspekto aki ta insólito tambe ku algun miembro di Staten ta bòikoteá Areglo di Estado dor di keda sin bai e reunion kaminda e investigashon di kredenshalnan di miembronan di Staten mester keda tratá i aprobá. Hasiendo esei, segun PIN, por papia di un violashon flagrante di nos demokrasia parlamentario i posiblemete un atentado kontra nos demokrasia. Pueblo di Kòrsou mester djis imaginé ku despues di un elekshon sekreto i liber, partidonan ku ta den negosashon pa forma un gobièrnu keda sin bai e prome reunion di Staten na momentu ku mester investigá i aprobá kredenshal di e sobra miembronan skohé durante e elekshon. 

 

Remarkabel ta ku ta netamente e mesun partidonan ku 3 aña i mei pasá kier a para elekshon ta inventando tur sorto di triki, lagando Kòrsou sin su parlamento ku e pueblo a skohe. Ta e mesun partidonan aki a duna Reino (lesa Hulanda) oportunidat pa intervení den nos asuntunan na komienso di 2017 ta krea e posibilidat awor pa Korte Komun intervení. 

 

Demokrasia parlamentario ta tuma lugá den reunionan den sala di Parlamento i no den media. Sigur na momentu ku pais ta pasando den krisis a konsekuensha di Covid-19, e parlamento mester ta uní ku interes di su pueblo ku e ta representá. No tin lugá bou di e sirkumstanshanan aktual pa sker nos demokrasia parlamentario pa interesnan partidario òf individual.

639114718427035"
639114718427035"