MINISTER ZITA JESUS-LEITO A INTRODUSÍ  E TRAYEKTO PA KOMBERTI KÒRSOU DI SHUSHI PA DUSHI.

MINISTER ZITA JESUS-LEITO A INTRODUSÍ  E TRAYEKTO PA KOMBERTI KÒRSOU DI SHUSHI PA DUSHI.

Willemstad- durante programa Bario pa Bario transmití ayera for di ofisina di Ministerio di Tráfiko, Transporte i Planifikashon Urbano (VVRP),  na Ararat, Minister Zita Jesus-Leito tabata enfátiko ku su ponensia ku esaki ta e momento pa harma un trayekto pa un transformashon total di Kòrsou su forma di anda ku shushi. 

Kòrsou lamentablemente a bira demasiado shushi i esei ta pone tur hende su salú na peliger, pasobra debí na e shushedat kasi tur kaminda riba e isla aki aktualmente, fásilmente enfermedatnan por lanta kabes ku tur e konsekuensianan teribel ku esaki ta trese kuné. Ademas e aktitut di benta shushi plenamente abou na suela, na sitionan públiko, manera kantu di kaminda, na vèlt i kanchanan deportivo, riba alsera, den bisindario di skolnan, den bario nan, na playa, den serkania di sierto  tienda, minimarket i supermerkadonan etcetera ta duna un imágen robes di Kòrsou. Komo si fuera habitantenan di e isla aki no ta stima nan pais. Mas ku nunka mester uni tur forsa konstruktivo pa para e mal kustumbernan aki i bòltu e tendensia aktual ku ta kompletamente robes.

Trayekto “Kòrsou di shushi pa dushi”.

Minister Zita Jesus-Leito a hasi menshon di e trayekto pa kombertí Kòrsou di shushi pa dushi. Den bista di e minister un limpiesa riguroso mester tuma lugá di manera ku denter di 5 luna Kòrsou ta kompletamente limpi. Pero, nada ad hoc! E biaha aki na un manera struktural i duradero. Kòrsou al final lo radia un esfera mas limpi i atraktivo. Pero atraves di e trayekto ku e minister aki ta bai enkaminá ta spera koperashon di empresanan, instansianan di gobièrnu, skolnan, dirigentenan di bario, organisashonnan sosial, iglesianan, pa surgi un transformashon total ku ta bai establesé e base di un komportashon síviko notabel. 

Den e programa di radio tabatin diferente invitado ku for di nan ekspertisio a amplia riba e tópiko di limpiesa. Invitadonan tabata entre otro sr. De Lanooy kende ta inspektor di medio ambiente i naturalesa i tambe sr. Leito ku ta kolaborador di departamentu di “Technische en Hygienische Zorg” kual ta resorta bou di e Ministerio di Salubridat. Medio Ambiente i Naturalusa. Ambos a mustra riba e konsekuensianan di un ambiente shushi pa salubridat di nos hendenan i tambe e echo ku mester traha pa hasi e deshasimentu di shushi di un forma ilegal, ménos atraktivo. 

Sr. Hugo Clarinda ku a representá Curacao Tourist Board, durante e programa, a trese pa dilanti esfuersonan ku ya nan a bin ta hasi, pa asina mantené nos áreanan turístiko liber di shushi, pa asina hasi nos pais mas atraktivo pa su bishitante nan.  

Luna di sèptèmber ta e luna ku mundu ta duna mas atenshon na e tópiko di limpiesa i organisashon Curacao Cleanup, ta organisá ya pa varios aña un limpiesa masal huntu ku voluntarionan riba e dia di limpiesa mundial. E aña aki esaki lo ta 19 di sèptèmber. Pa  e motibu aki a invitá sr. Plei komo representante di e organisashon pa duna informashon di e trabounan ku nan organisashon a bin ta hasi atraves di añanan tantu riba tera komo bou di awa. 

Na e momentunan aki Minister Zita Jesus-Leito komo e titular responsabel pa e dos karteranan, VVRP i GMN, ta trahando ku tantu e aparato públiko i partidonan priva na ehekushon di e plan di limpiesa grandi i duradero pa nos pais. Minister Jesus-Leito ta konvensí ku na momentu ku apliká e 3’E nan (Education, Engineering, Enforcement) segun siensia di seguridat den Tráfiko, pueblo di Kòrsou lo nota kambio duradero pa ku limpiesa di nos pais. 

Komo ku e tópiko di limpiesa ta unu asina amplio, lo sigui amplia riba esaki durante e próksimo edishon di  programa Bario pa Bario i tambe invitá ekspertonan manera sikólogo, antropólogo i representante di Selikor NV, ku por amplia riba e tópiko aki for di nan  ekspertisio. E siguiente edishon lo ta djadumingu 6 di sèptèmber 2020. Por sigui esaki via di radio Hoyer 101.9 FM òf página di Facebook Sinta Duru, Zita Jesus-Leito, Ministry of Health Curacao i tambe página di Ministerio di Tráfiko, Transporte i Planifikashon Urbano.